26.06.2026 | 14:46
Նիդերլանդների ԱԳՆ ներկայացուցչի հետ քննարկվել են հայկական արտադրանքի արտահանման հնարավորությունները դեպի ԵՄ
Սենատի հանձնաժողովը հետաձգել է Բաքվում ԱՄՆ դեսպանի թեկնածության հարցով քվեարկությունը
Քաղաքականություն
29.11.2018 | 15:01
Ամերիկյան Սենատի արտաքին հարաբերությունների հանձնաժողովը հետաձգել է Բաքվում ԱՄՆ դեսպան Էռլ Լիցենբերգերի թեկնածության քվեարկությունը՝ նախագահ Թրամփի ազգային անվտանգության հարցերով խորհրդական Ջոն Բոլթոնի՝ Ադրբեջանին զենք վաճառելու կոչի կապակցությամբ Կոնգրեսում աճող անհանգստության ֆոնին: Այս մասին տեղեկացնում է Ամերիկայի Հայ դատի հանձնախումբը (ANCA):
Հանձնախմբի հաղորդագրության համաձայն՝ Լիցենբերգերը դեսպանի պաշտոնի համար 19 թեկնածուներից միակն է, որի թեկնածության վերաբերյալ լսումները կանցկացվեն հաջորդ տարի:
«Մենք ողջունում են կոնգրեսականների՝ Ադրբեջանում Ալիևների ագրեսիվ ռեժիմի հետ մեր երկրի երկկողմ հարաբերություններն ավելի ուշադիր քննելու որոշումը՝ հատկապես ազգային անվտանգության հարցերով խորհրդական Ջոն Բոլթոնի՝ Բաքվին զենք վաճառելու մասին վիճելի առաջարկի ֆոնին»,- ասել է Հայ դատի Վաշինգտոնի գրասենյակի տնօրեն Արամ Համբարյանը:
ANCA-ի հաղորդագրության մեջ նշվում է, որ հոկտեմբերի 4-ին արտաքին հարաբերությունների հանձնաժողովում լսումների ժամանակ դեմոկրատ սենատոր Բոբ Մենենդեսը հարց էր ուղղել Էռլ Լիցենբերգերին Իլհամ Ալիևի «ռազմատենչ հռետորության և հանկարծակի բռնկումների» վերաբերյալ՝ թեկնածուից խոստում ստանալով, որ ադրբեջանական կառավարությանը կհորդորի հետ կանգնել ցանկացած տեսակի սպառնալից պահվածքից, որը կվնասի շփման գծում տիրող իրադրությանը: Լիցենբերգերը նշել է նաև, որ պետքարտուղարությունը «շատ զգույշ կլինի՝ երաշխավորելու համար, որ այն, ինչ իրենք անում կամ տրամադրում են Ադրբեջանին, չի թուլացնի Լեռնային Ղարաբաղի հակամարտության խաղաղ հանգուցալուծմանը հասնելու ջանքերը»:
