Ի՞նչ գիտեք` մարդկանց չենք գեներացնում փողոց դուրս գալու համար. Սամվել Կարապետյան․ ՏԵՍԱՆՅՈՒԹ

Factor TV-ի լրագրողի հարցին, թե ինչու իր ղեկավարած քաղաքական ուժը, որը ստացել է շուրջ 340 հազար ձայն, այդ մարդկանց չի դուրս բերում փողոց, եթե համոզված է, որ ընտրություններն անարդար են եղել, Սամվել Կարապետյանը պատասխանեց, որ նման գործընթաց կարող է լինել, սակայն դրա համար ժամանակ է անհրաժեշտ։

«Ի՞նչ գիտեք, որ չենք գեներացնում։ Գեներացնելը ժամանակի հետ է կապված, կգեներացնենք, մի օր դուրս կգան»,- ասաց նա։

Արձագանքելով այն պնդումներին, թե ընտրողների հետ գործարք է եղել, և իշխանության ներկայացմամբ նրանք ստացել են գումար, քվեարկել ու այլևս կապ չունեն Կարապետյանի հետ, վերջինս հերքեց ընտրակաշառքի մասին մեղադրանքները։

Նա դիմելով լրագրողին՝ ասաց. «Կարո՞ղ եք մեկ փաստ ներկայացնել։ Բոլոր լրագրողներով միասին գոնե մեկ մարդ գտեք, որին մենք փող ենք տվել»։

Երբ լրագրողը հիշեցրեց հրապարակված ձայնագրությունների մասին, որոնցում քննարկվում են գումարների թեմաները, Կարապետյանը նշեց, որ դրանք իր համար ապացույց չեն։

«Այդ ձայնագրությունները ձեզ համար են անում, մեզ համար դրանք փաստ չեն»,- ասաց նա։

Լրագրողի դիտարկմանը, թե արդյոք հետաքրքրվել է՝ ովքեր են ձայնագրություններում խոսող անձինք և ինչու են խոսում փողերի մասին, Կարապետյանը հակադարձեց՝ հարցնելով, թե արդյոք լրագրողը կհետաքրքրվեր, եթե ձայնագրեին իր հարևանին։

«Կյանքը ցույց կտա։ Ամեն ինչ կհայտնաբերենք։ Բոլորը պատասխանատվության կենթարկվեն՝ թե՛ ձայնագրողները, թե՛ դա կազմակերպողները, թե՛ ընտրություն կեղծողները»,- ասաց նա։

Ճեպազրույցի ավարտին լրագրողը հիշեցրեց, որ Կարապետյանին չի հաջողվել դառնալ վարչապետ, ինչին վերջինս պատասխանեց, որ այդ հարցը դեռ փակված չէ։

«Իսկ ո՞վ գիտի՝ չստացվեց։ Միգուցե Սահմանադրական դատարանը հուլիսի 4-ին որոշի, որ ես եմ վարչապետ»,- հայտարարեց Սամվել Կարապետյանը։

Մանրամասները՝ տեսանյութում։