Ուկրաինական ԱԹՍ-ների հարձակումից հետո Դոնեցկը, Խերսոնի և Զապորոժիեի շրջանների մի մասը մնացել են առանց էլեկտրականության

Բռնակցված Ղրիմի Նեկրասովկա գյուղը, օկուպացված Դոնեցկը, ինչպես նաև Խերսոնի և Զապորոժիեի մարզերի որոշ հատվածներ առանց էլեկտրաէներգիայի են մնացել ուկրաինական անօդաչու թռչող սարքի հարձակումից հետո, գրում է Current time-ը։

Ուկրաինական Exilenova+ մոնիթորինգային տելեգրամ ալիքը, հղում անելով տեղի բնակիչներին, հաղորդել է Դոնեցկում էլեկտրաէներգիայի անջատման մասին: «Крымский ветер»-ը հաղորդել է, որ բռնակցված Ղրիմի Նեկրասովկա գյուղի մոտ գտնվող ենթակայանը, հավանաբար, հարձակման է ենթարկվել, ինչի հետևանքով գիշերն էլեկտրաէներգիան անջատվել է: Այս տեղեկատվությունը պաշտոնապես հաստատված չէ։

Ռուսաստանի կողմից օկուպացված Խերսոնի մարզի «նահանգապետ» Վլադիմիր Սալդոն հայտարարել է, որ «Խերսոնի մարզի բոլոր շրջանները» լիովին կամ մասնակիորեն զրկված են էլեկտրաէներգիայից։

Օկուպացված Զապորոժիե մարզի ռուս «ղեկավար» Եվգենի Բալիցկին հայտնել է «Զապորոժիե մարզի զգալի մասում»  էլեկտրաէներգիայի վթարային անջատումների մասին։ Նրա տեղեկացմամբ՝ Ուկրաինայի զինված ուժերի հարձակումներից հետո էլեկտրաէներգիայի օբյեկտները վնասվել են։

Կերչում հրդեհ է գրանցվել փոքր ինքնաթիռների համար նախատեսված քաղաքացիական օդանավակայանի մոտ, որտեղ տեղակայված է «Պանցիր» համակարգը: Հրդեհ է բռնկվել Ղրիմի Կրասնոգվարդեյսկի շրջանում գտնվող խոշոր «Մարյանովկա» էլեկտրական ենթակայանում։

Բացի այդ, ըստ տեղեկությունների, Կրասնոդարի երկրամասում այրվում է Կուբանի անցակետը, որը Ռուսաստանի և Ղրիմի թերակղզու միջև էներգետիկ կամրջի մաս է։ Անցակետը ներառում է Կերչի նեղուցի հատակի երկայնքով անցնող ստորջրյա մալուխային գծերը և նեղուցի երկու կողմերում գտնվող անցակետերը։

Ռուսաստանի պաշտպանության նախարարությունը հայտնել է Բելգորոդի, Բրյանսկի, Կալուգայի, Կուրսկի, Օրյոլի, Ռոստովի, Սմոլենսկի, Տվերի և Տուլայի մարզերի, Կրասնոդարի երկրամասի, Մոսկվայի մարզի, բռնակցված Ղրիմի, Ազովի ու Սև ծովերի վրա ուկրաինական 209 ԱԹՍ-ների խոցման մասին։

Թարգմանությունը՝ Էմմա Չոբանյանի