Վնաս կա․ Պուտինը՝ Ուկրաինայի հարձակումների, բենզինի դեֆիցիտի, Անքորիջի համաձայնությունների մասին

ՌԴ նախագահ Վլադիմիր Պուտինը պետական «Ռոսիա»-ի թղթակից Պավել Զարուբինին տված հարցազրույցում անդրադարձել է Ռուսաստանում և բռնակցված Ղրիմում բենզինի պակասին, առաջնագծում Ուկրաինայի զինված ուժերի առաջխաղացումը, Ուկրաինայի հետ խաղաղության բանակցությունների հեռանկարներին, ինչպես նաև Անքորիջի գագաթնաժողովի արդյունքներին ու Բելառուսի նախագահի հետ հանդիպմանը։ BBC-ի ռուսական ծառայությունն անդրադարձել է հարցազրույցին՝  նշելով, որ Պուտինի որոշ դիտողություններ հակասում են ռուսաստանցի այլ բարձրաստիճան պաշտոնյաների հայտարարություններին։

Պուտինը խոստովանել է՝ Ռուսաստանում ներկայում վառելիքի որոշակի դեֆիցիտ կա, բայց իրավիճակը, ըստ նրա «կրիտիկական չէ»։ Նա դա կապել է ռուսական նավթավերամշակման գործարանների վրա ուկրաինական անօդաչու թռչող սարքերի հարձակումների հետ՝ նշելով, որ Ուկրաինայի հարվածներն «ակնհայտորեն խնդիրներ են ստեղծում», և որ «վնաս կա»։

Բռնակցված Ղրիմում և Սևաստոպոլում, որտեղ վառելիքի պակասը հանգեցրել է բնակիչներին դրա վաճառքի ժամանակավոր արգելքի, որոշ դեպքերում՝ սահմանափակ քանակի և QR կոդերով ու կտրոններով վաճառքի, ըստ Պուտինի՝ մի քանի օրվա վառելիքի պաշար կա, իսկ մատակարարումները «ցամաքով և ծովով կավելանան»։

«Ընդհանուր առմամբ, ամբողջ Ռուսաստանում բոլոր վնասված էներգետիկ օբյեկտները բավականին արագ վերականգնվում են»,- հայտարարել է Պուտինը՝ առանց կոնկրետ ժամկետներ նշելու։

Վառելիքի պակասի խնդիրը լուծելու համար, ըստ նրա, պետք է «ավելի արագ վերականգնել [նավթավերամշակման գործարանները], սահմանել անհրաժեշտ ներմուծման ծավալները և հուսալիորեն ապահովել [նավթավերամշակման գործարանները]» հակաօդային պաշտպանությամբ։ Պուտինը կարծում է, որ դրա համար պետք է կատարելագործել հակաօդային պաշտպանության համակարգերն ու ավելի շատ արտադրել դրանք, բայց այդ ամենը ժամանակ կպահանջի։

Բանակցությունների մասին 

Պուտինը հայտարարել է, թե Ռուսաստանի վառելիքաէներգետիկ ոլորտի վրա հարձակումները ոչ միայն վառելիքի ճգնաժամ առաջացնելու նպատակ են հետապնդում, այլև «Ռուսաստանին ստիպելու կասեցնել, գոնե կարճ ժամանակով, զորքերի առաջխաղացումը և պայմաններ ստեղծելու հակառակորդի համար բարենպաստ պայմաններով բանակցություններ սկսելու համար»։ Նրա պնդմամբ՝ երկրի խորքում հարվածները որևէ ազդեցություն չունեն ռազմաճակատում տիրող իրավիճակի վրա։

Հունիսի սկզբին Ուկրաինայի նախագահ Վլադիմիր Զելենսկին հայտարարել էր, որ սահմանից հեռու գտնվող ռուսական տարածքների վրա ուկրաինական հարձակումների ակտիվացումը պետք է խթանի խաղաղ բանակցությունները։

Հարցին՝ արդյո՞ք Մոսկվան որևէ նոր առաջարկ է ստացել ուկրաինական կողմից, Պուտինը պատասխանել է․ «Կան կապեր, և դրանք հաստատվել են մի քանի ուղղություններով, մի քանի գծերով։ Կան նաև նոր առաջարկներ»։

Ըստ նրա՝ այդ «գաղափարները» ներառում են «երկու կողմերից տարածքի խորքում հարվածների դադարեցումը» և ռազմական գործողությունների սահմանափակումը Ուկրաինայի «չորս տարածքներով»՝ Դոնեցկի, Լուգանսկի, Խերսոնի և Զապորոժիեի մարզերով։ Ռուսաստանի նախագահը չի նշել, թե երբ է Մոսկվան ստացել այս առաջարկները կամ ով է դրանք ներկայացրել։

Նա կրկին հայտարարել է, որ իր տեղեկությունների համաձայն՝ ռուսական զորքերն առաջ են շարժվում բազմաթիվ ուղղություններով և շարունակում են գրավել բնակավայրերն ու քաղաքները։