ՔԿ-ն ԱԱԾ-ի հետ համատեղ հանցագործություն է իրականացրել․ Արամ Օրբելյանին ընդհատեց Սեդա Սաֆարյանը․ ՏԵՍԱՆՅՈւԹ

Հունիսի 7-ի խորհրդարանական ընտրությունների արդյունքների վիճարկման գործով Սահմանադրական դատարանում հրավիրված նիստի 3-րդ օրն է։ Կողմերին հարցեր տալու հերթը «Հայաստան» դաշինքինն է։

Դաշինքի ներկայացուցիչ Հովհաննես Խուդոյանը հետաքրքրվեց «Բարգավաճ Հայաստան» կուսակցության ներկայացուցիչ Արամ  Օրբելյանից՝ արդյո՞ք Անդրանիկ Թևանյանի վերաբերյալ արտահայտությունները, որոնք հրապարակվել են վարչապետի և իրավապահ մարմինների կողմից, կուսակցությունը հնարավորություն է ունեցել հավասարության պայմաններով հակադարձել։

«Ո՛չ, որովհետև, ցավոք սրտի, Քննչական կոմիտեն իրականացրել է Ազգային անվտանգության ծառայության հետ համատեղ հանցագործություն»,-նշեց Օրբելյանը, ինչից հետո վերջինիս ընդհատեց Սահմանադրական դատարանի դատավոր Սեդա Սաֆարյանը։

«Դուք չեք կարող այստեղ վիրավորել»,-նշեց Սաֆարյանը։

Օրբելյանը հակադարձեց․ «Տիկի՛ն Սաֆարյան, Դուք չեք կարող ինձ սահմանափակել, ես չեմ վիրավորում»։

Դատարանի նախագահ Արման Դիլանյանը հանդարտության և զսպվածության կոչ արեց, ինչից հետո Օրբելյանը շարունակեց․ «Կուսակցություններից մեկի առաջնորդը (Նիկոլ Փաշինյանը-խմբ․) միտինգի ժամանակ ասել է՝ «վաղը հաղորդում է ներկայացվելու, պետական գաղտնիք է վաճառել»։ ԱԱԾ-ն վարչապետի ենթակա կառույց է։ Հաղորդում է տրվել, թե իբր Անդրանիկ Թևանյանը վաճառել է պետական գաղտնիք։ Քննչական կոմիտեն հրապարակել է, որ պետական գաղտնիք է վաճառվել, բայց մեղադրանք առաջադրելիս դա չի առաջադրել. առաջադրել է «այլ տեղեկատվության փոխանցում»։ Ասում ենք՝ բա այդ ի՞նչ է, ասում են՝ դե այլ է, պետական գաղտնիք չի, բայց ամեն տեղ խոսվել է, որ պետական գաղտնիք է վաճառվել։ Սա շատ կարևոր հանգամանք է. ասում են՝ «այլ տեղեկատվություն», բայց նյութերին ծանոթանալիս ասել են՝ «թող ստորագրեն, որ պետական գաղտնիք է»»։

Մանրամասները՝ տեսանյութում։