16.07.2026 | 23:29
Հետաքննությունը պարզել է, որ Ալիևի թոռներն անօրինական կերպով օգտագործում են պաշտոնական լիմուզիններն և անվտանգության մեքենաները
Ընտրական ցենզ սահմանելու փոփոխություններն օրինական ու սահմանադրական չեն․ Արամ Վարդևանյան. ՏԵՍԱՆՅՈՒԹ
Քաղաքականություն
25.06.2026 | 20:13
«Ուժեղ Հայաստան» կուսակցությունների դաշինքի պատգամավորի թեկնածու Արամ Վարդևանյանը Factor TV-ի հարցին ի պատասխան քննադատեց իշխանության կողմից առաջարկվող ընտրական ցենզի սահմանումը՝ այն անվանելով ոչ ողջամիտ, ոչ օրինական և ոչ սահմանադրական։
Հիշեցնենք, որ ՔՊ խմբակցության պատգամավորներ Ալխաս Ղազարյանի, Արուսյակ Մանավազյանի, Արուսյակ Ջուլհակյանի և Հասմիկ Հակոբյանի հեղինակած նախագծով առաջարկվում է ընտրություններին և հանրաքվեներին մասնակցելու իրավունք վերապահել միայն այն քաղաքացիներին, որոնք նախորդող մեկ տարվա ընթացքում Հայաստանում գտնվել են առնվազն 183 օր։
Կառավարությունը, սկզբունքորեն ընդունելով նախաձեռնությունը, առաջարկում է ավելի խիստ չափանիշ՝ վերջին երկու տարվա ընթացքում Հայաստանում գտնվել առնվազն 366 օր։
Factor TV-ի հետ զրույցում Արամ Վարդևանյանը հայտարարեց, որ նախագիծն իրականում սահմանափակում է ընտրական իրավունքը և քաղաքական նպատակներ է հետապնդում։
«Կարծում եմ՝ այդ փոփոխությունները ողջամիտ չեն, օրինական չեն, սահմանադրական չեն։ Եթե նախագծի հեղինակները լիարժեք անկեղծ լինեին, կարող էին ուղղակի նոր ընտրական ցենզ սահմանել՝ ընտրություններին կարող են մասնակցել միայն «Քաղաքացիական պայմանագիր» կուսակցության աջակիցները կամ նրանց հետ համագործակցող ուժերի ներկայացուցիչները։ Դա կլիներ իրական նպատակի բացահայտումը»,- ասաց նա։ Միևնույն ժամանակ Վարդևանյանը չի կարծում, որ նախաձեռնությունն անմիջական կապ ունի Սահմանադրական դատարանում ընտրությունների արդյունքների վիճարկման գործի հետ։
«Չեմ կարծում, որ դա կապված է Սահմանադրական դատարանում ընթացող գործընթացի հետ։ Կարծում եմ՝ այն այլ նպատակներ է հետապնդում, որոնց մասին այս փուլում դեռ վաղ է խոսել»,- նշեց պատգամավորը։
Մանրամասները՝ տեսանյութում։
Արփի Հակոբյան
