Կարող է իր ներողություններն իրեն պահել․ Զելենսկին Լուկաշենկոյից «կոնկրետ քայլեր» է պահանջում

Ուկրաինայի նախագահ Վլադիմիր Զելենսկին ուկրաինական ТСН հեռուստալիքին տված հարցազրույցում հայտարարել է, որ Բելառուսի ղեկավար Ալեքսանդր Լուկաշենկոն պետք է կոնկրետ քայլեր ձեռնարկի՝ ցույց տալու համար, որ Մինսկը չի օգնում Մոսկվային Կիևի դեմ լայնածավալ պատերազմում, գրում է Current time-ը։

Զելենսկին հիշեցրել է, որ Լուկաշենկոյին մեկ շաբաթ ժամանակ է տվել Բելառուսում գտնվող վերահեռարձակման համակարգերը հեռացնելու համար, որոնք, ըստ Կիևի, օգտագործվում են Ուկրաինայի վրա ռուսական անօդաչու թռչող սարքերի հարվածներն ուղղորդելու համար: Զելենսկին ընդգծել է, որ Ուկրաինան վաղուց է այս հարցը մասնավոր կարգով բարձրացնում. նրա խոսքով՝ սա «երեկվա պատմություն չէ, այլ երկարատև գործընթաց, որի հետևում բացառապես ուկրաինական կողմի զոհողություններն են»:

«Քանի որ սա նրանց բազմիցս հաղորդվել է, մենք անցել ենք հրապարակային հայտարարությունների փուլին»,- ասել է Զելենսկին՝ նշելով, որ եթե Լուկաշենկոն մեկ շաբաթվա ընթացքում չհեռացնի  համակարգերը, Ուկրաինան դրանք «կհեռացնի»:

Զելենսկին չի մանրամասնել, թե ինչպես: Նա նաև ասել է, որ Բելառուսի իշխանություններին ազդանշաններ են ուղարկվում ռուսական բանակին վառելիքի մատակարարումը դադարեցնելու անհրաժեշտության մասին: Այս դեպքում նա ուղղակիորեն չի սպառնացել հարվածել նավթավերամշակման գործարանին՝ նշելով. «Սա միայն ազդանշան է. սպառնալիքներ չկան: Մենք պարզապես ասում ենք, որ տեսնում ենք դա»:

Ուկրաինայի նախագահն ակնկալում է, որ Լուկաշենկոն կձեռնարկի կոնկրետ գործողություններ, այլ ոչ թե ներողություն կխնդրի։

«Նա կարող է իր ներողություններն իրեն պահել․ դրանք չեն աշխատել պատերազմի առաջին օրվանից ի վեր»,- ասել է նա՝ հավելելով, որ Լուկաշենկոն դեռևս չի արձագանքել իր խոսքերին։

Զելենսկին հունիսի 19-ին մեկ շաբաթ ժամանակ էր տվել՝ Գոմելի և Բրեստի շրջաններում տեղակայված կայանները հեռացնելու համար, ինչը նշանակում է, որ վերջնաժամկետը լրանում է հունիսի 26-ին։

Մայիսի 21-ին Ալեքսանդր Լուկաշենկոն հայտարարել էր, որ Մինսկը չի պատրաստվում միանալ Ուկրաինայի դեմ պատերազմին։ Նա նաև մանրամասնել էր, որ դա կարող է տեղի ունենալ Բելառուսի դեմ ագրեսիայի դեպքում։ Հունիսի 16-ին Լուկաշենկոն կրկին հայտարարեց, որ երկիրը մտադիր չէ մտնել պատերազմի մեջ և չի ցանկանում, որ հակամարտությունը տարածվի իր տարածքում։ Նա նաև ներողություն էր խնդրել Զելենսկիից նախկին կոշտ խոսքերի համար։

Խոսելով Բելառուսի՝ Ուկրաինայի հետ պատերազմի մեջ մտնելու հնարավորության մասին՝ Լուկաշենկոն ասել էր, որ այդ դեպքում Բելառուսը «շատ խոցելի կլինի ռազմական առումով», քանի որ «Բելառուսը գտնվում է ուկրաինական զինվորականների ձեռքի ափի մեջ»։

«Մենք հիանալի հասկանում ենք, որ մեր հիմնական ենթակառուցվածքները՝ արտադրությունը և լոգիստիկան, հարձակման տակ կլինեն: Նրանք հայտարարել են, որ արդեն իսկ ունեն 500 նման թիրախ Բելառուսի տարածքում»:

Լուկաշենկոն դեռևս չի մեկնաբանել Զելենսկիի պահանջը: Բելառուսի պաշտպանության նախարար Վիկտոր Խրենինը հայտարարել է, որ «Բելառուսի ռազմավարությունն է՝ խուսափել հակամարտությանը ներգրավվելուց և ապահովել իր քաղաքացիների անվտանգությունը»:

«Մեր նախագահը հստակ սահմանել է ռազմավարությունը. ռազմական առումով բացարձակապես իմաստ չկա ներգրավվել հակամարտությունում»,- հայտարարել է նա, սակայն չի անդրադարձել համակարգերի հարցին:

Թարգմանությունը՝ Էմմա Չոբանյանի