22.06.2026 | 16:24
ՍԴ-ն փաստաթղթեր է պահանջել մի շարք պետական մարմիններից․ ՔՊ-ն որպես 3-րդ անձ է ներգրավվել
«Մենք ենք մեր սարերը» հուշարձանի քանդման լուսանկարը կեղծ է
22.06.2026 | 12:25
Համացանցում ակտիվորեն տարածվում է լուսանկար, որտեղ երևում է, թե ինչպես են շինարարական տեխնիկայի կիրառմամբ Ստեփանակերտում քանդում Արցախի «Մենք ենք մեր սարերը» հուշարձանը։
Factor TV-ն ստուգել է լուսանկարը, և AI դետեկտորները ցույց են տալիս բարձր հավանականություն, որ այն գեներացված է արհեստական բանականության օգնությամբ։
Ֆեյսբուքում լուսանկարը տարածել է քաղաքական ակտիվիստ Մանուել Մանուկյանը, իսկ ավելի ուշ՝ Արցախի մշակութային ժառանգության օմբուդսմենի հայտարարությունից հետո, որ լուսանկարում տեղ գտած իրադարձությունը չի հաստատվում, հեռացրել է այն։
Հայտարարության մեջ նաև ասվում է, որ լուսանկարի իսկությունը, դրա ստեղծման ժամանակը, վայրը, ինչպես նաև ներկայացված իրադարձության համապատասխանությունն իրականությանը գտնվում են ստուգման փուլում։
Արցախի մշակութային ժառանգության օմբուդսմենի հայտարարությունից հետո ֆեյսբուքում այս լուսանկարով կիսվել է նաև ճարտարապետ Անահիտ Թարխանյանը։
Լուսանկարի արտաքին զննմամբ ակնհայտ է մարդու և հուշարձանի մասշտաբների անհամապատասխանությունը։
Կեղծ լուսանկարում կարմիր շրջանակով նշված մարդը իր ֆիզիկական չափերով անհամաչափ փոքր է երևում հուշարձանի համեմատ։ Մինչդեռ իրական լուսանկարում նույն հատվածի հետ համեմատելիս նկատելի է, որ մարդը հուշարձանի կողքին զգալիորեն ավելի մեծ է երևում։
Այս տարբերությունը վկայում է, որ կեղծ լուսանկարում մարդու կամ հուշարձանի մասշտաբը խախտված է, ինչի հետևանքով պատկերում առկա է համամասնությունների ակնհայտ անհամապատասխանություն։
Առաջին լուսանկարը կեղծ է, երկրորդը՝ իրական
Lուսանկարը երեկվանից սկսել է տարածվել ադրբեջանական աղբյուրների կողմից։
Ֆեյսբուքում այն տարածել է ադրբեջանցի օգտատեր՝ Xankəndililər-ի, ինչը թարգմանաբար նշանակում է Ստեփանակերտցիներ։ Այդ էջը ունի ավելի քան 6000 հետևորդ։
Հատկանշական է, որ այդ լուսանկարը տարածվել է հարցադրմամբ՝ «պահպանել թե քանդել»։
Այն տարածվել է նաև ռուսալեզու թելեգրամյան ալիքիներից մեկի՝ ДЕВУШКА С РУЖЬЕМ օգտատիրոջ կողմից։
Այսպիսով՝ համացանցում տարածվող լուսանկարը, որտեղ երևում է, թե ինչպես են քանդում Ստեփանակերտում գտնվող «Մենք ենք մեր սարերը» հուշարձանը, չի հաստատվում ոչ մի աղբյուրով. լուսանկարում ներկայացվածը կեղծ է։
Մարիա Խաչատրյան
