«Տելեկոմ Արմենիա»-ն և «AzerTelecom»-ը համաձայնագիր են ստորագրել ինտերնետ թրաֆիկի տարանցման վերաբերյալ

«Տելեկոմ Արմենիա» և «Ազերտելեկոմ» ընկերությունները ստորագրել են երկկողմ համաձայնագիր, որը նախատեսում է երկու երկրների տարածքներով տարանցիկ ինտերնետի փոխանցում և մատակարարում՝ կոմերցիոն հիմունքներով։ Այս մասին հայտնում են «Տելեկոմ Արմենիա» ընկերությունից։

«Համաձայնագրի շրջանակում «Տելեկոմ Արմենիան», հանդիսանալով տարածաշրջանում առաջատար տարանցիկ օպերատոր, ընդլայնում է միջազգային ինտերնետային տրաֆիկի մատակարարման երկրների թիվը և աշխարհագրությունը՝ ապահովելով տարանցումը սեփական ենթակառուցվածքների միջոցով դեպի Ադրբեջան։

Համաձայնագիրը նպատակ ունի նպաստելու տարածաշրջանում կապուղիների դիվերսիֆիկացմանը, հեռահաղորդակցության ցանցերի հուսալիության բարձրացմանը և տելեկոմ ոլորտում համագործակցության զարգացմանը»,- ասված է հաղորդագրության մեջ։

Ադրբեջանական կողմի հաղորդմամբ՝ համաձայնագրերի շրջանակներում,«AzerTelecom»-ը կընդլայնի իր միջազգային ինտերնետային թրաֆիկի  մատուցման ծառայությունների աշխարհագրությունը և կապահովի ինտերնետային թրաֆիկի տարանցում դեպի Հայաստան՝ օգտագործելով իր սեփական ենթակառուցվածքները։

Նշվում է, որ նման համաձայնագրերը նպաստում են տարածաշրջանում կապի ուղիների դիվերսիֆիկացիային, հեռահաղորդակցության ցանցերի հուսալիության հետագա բարձրացմանը և հեռահաղորդակցության ոլորտում համագործակցության զարգացմանը։

Ադրբեջանական կողմի տարածած հաղորդագրության համաձայն՝ «AzerTelecom»-ը  Ադրբեջանի առաջատար հեռահաղորդակցության ընկերությունն է, որը մեծածախ ինտերնետային թրաֆիկի փոխանցման ծառայություններ է մատուցում, կապի ծառայություններ, նորարարական թվային լուծումներ և այլ առաջադեմ հեռահաղորդակցության ծառայություններ: Ընկերությունն իրականացնում է «Թվային մետաքսի ճանապարհ» (Digital Silk Way ) միջմայրցամաքային նախագիծը, որի նպատակն է ստեղծել նոր թվային միջանցք Եվրոպայի և Ասիայի միջև։  «AzerTelecom»-ը մտնում է Azerconnect Group խմբի մեջ, որը միջազգային NEQSOL Holding ընկերությունների խմբի մաս է կազմում և գործունեություն է  իրականացնում տարբեր երկրներում և ոլորտներում։

Էմմա Չոբանյան