03.08.2026 | 15:05
Մոտիկից չեմ տեսել ռուսի, որը զենք է վաճառել Ադրբեջանին` Հայաստանի դեմ կիրառելու համար. Կարապետյան․ ՏԵՍԱՆՅՈՒԹ
Factor TV-ի հրապարակումից հետո դատապարտյալի համար շտապօգնություն է կանչվել. նա դադարեցրել է հացադուլն ու ջրադուլը
Հասարակություն
18.06.2026 | 11:44
«Երևան-Կենտրոն» քրեակատարողական հիմնարկի դատապարտյալ Հայկ Գալստյանն այսօր դադարեցրել է հացադուլն ու ջրադուլը, որը հայտարարել էր 8 օր առաջ։ Այս մասին Factor TV-ին հայտնեց հենց դատապարտյալը։
«Երեկ ձեր հրապարակումից հետո շտապօգնություն կանչեցին, ստուգեցին առողջական վիճակս, ճնշումս ու սատուրացիաս բավականին ցածր էր։ Նաև ոնց որ թե էն խնդիրս ա լուծում ստանում, որի պատճառով գնացել էի ծայրահեղ քայլի ու հացադուլ, ջրադուլ հայտարարել»,- նշեց Գալստյանը։
Հիշեցնենք՝ երեկ ավելի քան 20 տարի անազատության մեջ գտնվող Հայկ Գալստյանը Factor TV-ին ահազանգել էր, որ 7 օր է՝ հացադուլ և ջրադուլ է հայտարարել, իր առողջական վիճակը ծանր է, սակայն շտապ օգնություն չեն կանչում։
«Հունիսի 11-ից հացադուլ ու ջրադուլ եմ հայտարարել, 52 տարեկան մարդ եմ, էս ծայրահեղ քայլին եմ գնացել, որ իմ նկատմամբ իրականացված անարդարությունը բարձրաձայնեմ, իսկ իրենք․․․ես՝ մահամերձ վիճակում, ինձ համար շտապօգնություն չեն կանչում։ Գալիս իրենց համար ճնշումս ու սատուրացիաս չափում են, ժուռնալում՝ գրում ու վերջ, գնում են»։
Հայկ Գալստյանը մեծ մասն անցկացրել է «Նուբարաշեն» ՔԿՀ-ում, ամիսներ առաջ՝ տեղափոխվել «Երևան Կենտրոն»։ Դատապարտյալի խոսքով՝ ապօրինիությունների մասին է բարձրաձայնել, և, որպես պատիժ, իրեն տեղափոխել են։
«Չեմ դադարեցնելու, մինչև իմ հանդեպ իրականացվող անարդարությունը չվերացվի»,- երեկ հայտարարել էր նա։
Այսօր դատապարտյալը նշեց, որ Factor TV-ի հրապարակումից հետո հնարավոր է տեղափոխման հարցը ևս լուծում ստանա։
Նշենք, որ երեկ «Քրեակատարողական բժշկության կենտրոն» ՊՈԱԿ-ի բժշկական օգնության կազմակերպման բաժնի պետ Նաիրա Բաբայանը Factor TV-ի հետ զրույցում, թեև զերծ էր մնացել Գալստյանի առողջական վիճակի մասին մանրամասներ հայտնելուց, նշելով, որ դա բժշկական գաղտնիք է, այնուամենայնիվ ընդգծել էր՝ չի եղել դեպք, որ որևէ կալանավոր կամ դատապարտյալ շտապ օգնության կարիք ունենա ու չկանչվի։
«Բոլոր քրեակատարողական հիմնարկներում հացադուլի մեջ գտնվող անձինք, բոլոր ժամանակներում իրենց հացադուլի ընթացքում գտնվում են մշտական 24-ժամյա հսկողության տակ՝ բուժանձնակազմի կողմից։ Ու իրենց համար ցանկացած պահի, երբ որ կարիքը լինի, առողջական վիճակով պայմանավորված շտապօգնության կանչ, այդ կանչը տրվում է, եթե չի տրվել, նշանակում է՝ այդ պահի դրությամբ տվյալ անձի առողջական վիճակի գնահատումը շտապօգնության կանչի ցուցում չի ենթադրել։ Այսինքն, բոլորը գտնվում են բուժանձնակազմի հսկողության տակ՝ դինամիկ, հեմոդինամիկ տվյալների չափումներով, կշռումներով և այլն, օբյեկտիվ զննումների արդյունքում բուժանձնակազմը պետք է գտնի, որ կարիք կա շտապօգնության կանչի։ Մենք ինքներս լիցենզավորված, հավաստագրված բուժօգնություն տրամադրող կազմակերպություն ենք, ունենք բժիշկներ, բուժքույրեր, դեղորայք՝ ամեն ինչ պատշաճ բուժօգնություն տրամադրելու համար։ Շտապօգնության կանչը պետք է լինի այն դեպքում, երբ անձի առողջական վիճակի վատթարացումը այնպիսինն է, որ տեղում բուժօգնության ծավալների անհամապատասխանություն կա, այսինքն՝ տեղում տրամադրված բուժօգնությունն այդ կարիքին չի բավարարում»։
Ըստ «Դատալեքս» դատական-տեղեկատվական համակարգի, Հայկ Գալստյանի մասով մեկ տասնյակ և ավելի քրեական գործեր ու դատավճիռներ կան, որոնց մի մասը՝ խարդախության հատկանիշներով։
Ռոզա Վարդանյան
