Ռուսաստանը հարձակվել է ուկրաինական Պոլտավայի, Սումիի և Դնեպրոպետրովսկի մարզերի վրա․ զոհեր և վիրավորներ կան

Ռուսաստանը հունիսի լույս 18-ի գիշերն Ուկրաինայի ուղղությամբ արձակել է յոթ «Իսկանդեր-M/C-400» բալիստիկ հրթիռ և 239 անօդաչու թռչող սարք։ Ուկրաինայի ռազմաօդային ուժերը հայտնել են, որ ուկրաինական ուժերը խոցել են չորս հրթիռ և 212 անօդաչու, գրում է Current time-ը։

Պոլտավայի տարածաշրջանային ռազմական վարչակազմի ղեկավար Վիտալի Դյակիվնիչը հայտնել է, որ ռուսական ուժերը հարվածել են մարզի երկու շրջաններին: Պոլտավայի շրջանում վնասվել են ձեռնարկության և վարչական շենքի տեխնոլոգիական սարքավորումները, որի հետևանքով մեկ մարդ վիրավորվել է: Անօդաչու թռչող սարքերը հարձակվել են նաև մասնավոր տան և էներգետիկ ենթակառուցվածքների օբյեկտի վրա, ինչի հետևանքով էլեկտրաէներգիայի անջատում է տեղի ունեցել: Միրգորոդի շրջանում անօդաչու թռչող սարքի վթարի հետևանքով վնասվել են պահեստներ:

Դնեպրոպետրովսկի մարզում վիրավորվել է մեկ մարդ։ Ռազմական վարչակազմի ղեկավար Ալեքսանդր Գանժայի հաղորդմամբ՝ տուժածը Նիկոպոլի շրջանի բնակիչ է, որտեղ ռուսական հարձակման հետևանքով վնասվել է վարչական շենք, ենթակառուցվածքներ, մեքենաներ, բնակարանային շենքեր և մասնավոր տներ։

Կրիվոյ Ռոգի շրջանում և Սամար քաղաքում վնասվել են ենթակառուցվածքներ, Կամենսկոեում վնասվել է ձեռնարկություն, իսկ Սինելնիկի շրջանում՝ մասնավոր տներ և մեքենա։

Սումիում ռուսական հարձակման հետևանքով տղամարդ է մահացել։ Նրա մարմինը հայտնաբերվել է մասնավոր տանը բռնկված հրդեհը մարելուց հետո։ Ըստ Ուկրաինայի պետական ​​արտակարգ իրավիճակների ծառայության՝ փրկարարները օգնել են վնասված ինը հարկանի շենքում գտնվող մի կնոջ։