Ուկրաինական ԱԹՍ-ները կրկին գրոհել են Մոսկվան ու Մերձմոսկվան․ տեղի նավթավերամշակման գործարանում հրդեհ է բռնկվել

Ուկրաինական անօդաչու թռչող սարքերը հարձակվել են Մոսկվայի և Մերձմոսկովյան շրջանի վրա՝ հարվածելով Կապոտնյայում նավթավերամշակման գործարանին։ Այս մասին հայտնել է Մոսկվայի քաղաքապետ Սերգեյ Սոբյանինը։

Անօդաչու թռչող սարքի բեկորներն ընկել են նաև «Սադովոդ» առևտրի կենտրոնի տարածքում՝ վնասելով մեկ շենք, բայց  տուժածներ չկան։ Սոբյանինի խոսքով՝ ՀՕՊ ուժերը որսացել են 137 անօդաչու թռչող սարք, երբ դրանք մոտենում էին Մոսկվային։

Մոսկվայի մարզի Ժուկովսկի քաղաքում անօդաչուն հարվածել է Գագարինի փողոցի բնակելի շենքին, հայտնել է նահանգապետ Անդրեյ Վորոբյովը։ Նրա խոսքով՝ վնասվել են 23-րդ և 24-րդ հարկերի միջև գտնվող հրդեհային անցուղին և երկու պատշգամբի սալիկները։ Նախնական տվյալներով՝ տուժածներ չկան։

Անօդաչու թռչող սարքի բեկորներ են ընկել նաև Էլեկտրոստալում՝ վնասելով մասնավոր տան տանիքը, վիրավորելով մեկ կնոջ։ Լյուբերցիում բեկորներն ընկել են մի քանի վայրերում՝ վնասելով մարզասրահ և արդյունաբերական գոտում գտնվող մի օբյեկտ։ Ընկնող բեկորները նաև հրդեհ են առաջացրել Մոսկվայի մարզի Կոտելնիկի քաղաքի «Բելայա Դաչա» առևտրի կենտրոնի տանիքում։

Հարձակման հետևանքներ կան նաև Չեխովում, Կրյուկովո բնակավայրում և Պավլովսկի Պոսադում։ Վորոբյովի խոսքով՝ այնտեղ տուժածներ չկան։

Տելեգրամ ալիքների, այդ թվում՝ Astra-ի հաղորդմամբ՝ Ռոստովի մարզի Գուկովո քաղաքում այրվում է նավթաբազա։ Նահանգապետ Յուրի Սլյուսարն իր հայտարարության մեջ չի հիշատակել նավթաբազան։ Նա հայտնել է դիզելային շոգեքարշի վնասման և «երկու առևտրային օբյեկտներում» բռնկված հրդեհի մասին։ Նա նաև հաղորդել է, որ մեկ մարդ զոհվել է, ևս երկուսը՝ վիրավորվել։ Նրանք Գուկովո երկաթուղային կայարանի բեռնատար կայարանի աշխատակիցներ էին։

Ռուսաստանի պաշտպանության նախարարությունը հայտնել է Աստրախանի, Բելգորոդի, Բրյանսկի, Վոլգոգրադի, Վորոնեժի, Վլադիմիրի, Կալուգայի, Կուրսկի, Լիպեցկի, Օրյոլի, Սմոլենսկի, Տամբովի, Տվերի, Տուլայի, Ռոստովի, Ռյազանի մարզերի, Մոսկվայի մարզի, բռնակցված Ղրիմի և Ազովի ծովի վրա ուկրաինական 555 ԱԹՍ-ների խոցման մասին։

Թարգմանությունը՝ Էմմա Չոբանյանի