17.06.2026 | 16:30
Փաշինյանն ու կառավարության անդամները պատասխանում են պատգամավորների հարցերին․ ՈՒՂԻՂ
Ստոկհոլմի արբիտրաժը բավարարել է Հայաստանի միջնորդությունը՝ ՀԷՑ-ի գործով
Հասարակություն
17.06.2026 | 14:49
Ստոկհոլմի արբիտրաժային տրիբունալը բավարարել է Հայաստանի կառավարության միջնորդությունը՝ Liormand Holdings Limited-ի և Կարապետյանների կողմից ներկայացված հայցով վարույթը երկատելու վերաբերյալ։ Տրիբունալը նախնական փուլում առանձին կքննարկի Հայաստանի ներկայացրած իրավազորության առարկությունները, այդ թվում՝ կառավարության պնդումը, որ հայցվորները չեն համապատասխանում միջազգային համաձայնագրով սահմանված «ներդրող» կարգավիճակին։ Կառավարության գնահատմամբ՝ որոշումը հնարավորություն է տալիս ավելի վաղ փուլում հասնել Հայաստանի դեմ ներկայացված պահանջների ամբողջական մերժմանը։
«Ստոկհոլմի արբիտրաժային տրիբունալը 2026 թվականի հունիսի 16-ի որոշմամբ ամբողջությամբ բավարարել է վարույթի երկատման Հայաստանի միջնորդությունը` Liormand Holdings Limited ընկերությունը և Կարապետյաններն ընդդեմ Հայաստանի արբիտրաժային գործով:
Հայաստանը ներկայացրել էր փաստարկներ, որոնցով հիմնավորել է, որ արբիտրաժային տրիբունալի կողմից գործի քննության իրավազորությունը բացակայում է։ Միջազգային տրիբունալը բավարար հիմքեր է տեսել Հայաստանի Կառավարության ներկայացված բոլորը փաստարկները վարույթի նախնական փուլում առանձին քննության առարկա դարձնելու համար։
Հայաստանի էական փաստարկներից է այն, որ Կարապետյանները չեն բավարարում համապատասխան միջազգային համաձայնագրով ամրագրված «ներդրող» հասկացության պահանջներին, ինչպես նաև խախտել են այդ համաձայնագրի 9(2)-րդ հոդվածի պահանջները։
Այս կարևոր որոշումը հնարավոր է դարձնում, որ միջազգային տրիբունալը շատ ավելի վաղ փուլում քննարկի իրավազորության հարցերը և ամբողջությամբ մերժի Հայաստանի դեմ ներկայացված բոլոր պահանջները»,- ասված է ՀՀ կառավարության տարածած հաղրդագրությունում։
Հիշեցնենք, որ որ դեռևս 2025 թ․ հուլիսի 23-ին, Սամվել Կարապետյանի պաշտպանական խորհուրդը հայտարարություն էր տարածել այն մասին, որ Սամվել Կարապետյանը ՀԷՑ-ը պետականացնելու գործով «հաղթել է ՀՀ կառավարությանը միջազգային դատարանում»։ Խոսքը, սակայն, ոչ թե գործով վերջնական հաղթանակի մասին էր, այլ մինչև վերջնական որոշման կայացումը անհետաձգելի միջոց կիրառելու։ Ըստ հայտարարության՝ «դատարանը Հայաստանի Հանրապետությանը պարտավորեցրել է ձեռնպահ մնալ «Հայաստանի էլեկտրական ցանցեր» փակ բաժնետիրական ընկերության նկատմամբ վերջերս ընդունված «էներգետիկայի մասին» և «Հանրային ծառայությունները կարգավորող մարմնի մասին» ՀՀ օրենքներով սահմանած դրույթների կիրառումից, ինչպես նաև «ՀԷՑ» փակ բաժնետիրական ընկերության բռնագրավման հետագա քայլերից»։
Արբիտրաժային գործի քննությունը Կարապետյանների ընտանիքը նախաձեռնել է Ստոկհոլմի առևտրային պալատի արբիտրաժային ինստիտուտում (SCC)` Հայաստանի Հանրապետության կառավարության և Կիպրոսի Հանրապետության կառավարության միջև 1995թ․ հունվարի 18-ին կնքված Ներդրումների խրախուսման և պաշտպանության համաձայնագրով սահմանված կարգով։
