Սուր, կոշտ և դաժան ընտրապայքար էր սկսվել ընտրազանգվածի համար․ Բաղդասարյանն ամփոփեց քարոզարշավը․ ՏԵՍԱՆՅՈՒԹ

Ինչպես և ինչ առանձնահատկություններ են կիրառել հայաստանյան հինգ առցանց լրատվամիջոցներն ԱԺ նախընտրական քարոզարշավի լուսաբանման ժամանակ։

«Ռեգիոն» կենտրոնն ուսումնասիրել է Aravot.am-ի, Factor.am-ի, Civilnet.am-ի, Azatutyun.am-ի և Sputnik.am-ի աշխատանքն ու առանձնացրել լուսաբանման տեխնիկան։

«Մենք նաև ընտրել ենք այս լրատվամիջոցներին՝ լսարանների վրա և ընդհանրապես, այսպես ասեմ, պոտենցիալ ընտրազանգվածի վրա ազդեցությունների տեսանկյունից։ Մեր հետազոտության առանձնահատկությունն այն է, որ մենք նաև ֆեյսբուքյան հարթակներն ենք ուսումնասիրում։ Ինչու՞ «Facebook», որովհետև ամենատարածված և տարբեր տեքստային կոնտենտներ գեներացնելու ամենահարմար հարթակներն են, որովհետև «Facebook»-ում բոլորն են, և այսպես ասենք, նախընտրական գործընթացի երեք կարևոր դերակատարների ներկայությունը կա «Facebook»-ում. դրանք քաղաքական ուժերն են, դրանք մեդիաներն են, որոնք խողովակի՝ հաղորդակցական խողովակ են որպես ծառայում այդ գործընթացի ժամանակ, և դրանք հենց իրենք՝ ընտրազանգվածներն են, որոնք այլևս արդեն վաղուցվանից պասիվ օբյեկտի դերում չեն, նրանք մասնակից են ակտիվ սուբյեկտի դերակատարմամբ այս ամբողջ ընտրազանգվածում։

Եվ հետևաբար բավական սուր և կոշտ, և ես կասեի նույնիսկ տեղ-տեղ դաժան մրցապայքար է նաև Հայաստանում սկսվել վերջին երկու-երեք ընտրաարշավների ընթացքում ընտրազանգվածի համար։ Հատկապես այս վերջին ընտրությունների ժամանակ դա շատ ակնհայտ երևում էր այն առումով, որ ազդեցությունները և շրջանառվող բովանդակությունները վիթխարի ծավալների էին հասնում և՛ «Facebook»-ում, և՛ մեդիայում, իհարկե հաշվի առնելով, որ սրանք տարբեր ԶԼՄ-ներ են՝ տարբեր ձեռագրերով»,- նշեց կենտրոնի ղեկավար Լաուրա Բաղդասարյանը։

Մոնիտորինգի ժամանակ կենտրոնում փորձագետները վերլուծել են 3390 բովանդակային նյութ ընտրությունների մասին՝ 5 ԶԼՄ-ները միասին վերցրած և 4770 ընտրությունների մասին նյութ, որոնք քարոզարշավի 29 օրերի ընթացքում գեներացրել են 18 կուսակցություններն իրենց էջերում։

«ԶԼՄ-ները շատ հետաքրքրված էին հատկապես այս քարոզարշավով, մենք չենք կարող հիմնավոր կերպով, որովհետև ցանկացած բոլոր քարոզարշավներն էլ ԶԼՄ-ների համար կարևոր են, բայց ի տարբերություն, օրինակ, տեսալսողական մեդիայի, որը որ ունի որոշակի պարտավորություններ ընտրական օրենսգրքից բխող, օնլայն ԶԼՄ-ները նման ծանրաբեռնվածություն չունեն որոշակի պարտավորություններով, բացառությամբ գովազդի տեղադրման պարտավորություններից»,- ասաց Բաղդասարյանը։

Մանրամասները՝ տեսանյութում։