«Ռոսսելխոզնադզոր»-ի ղեկավարը հայտարարել է, թե ՀՀ-ից ներմուծման սահմանափակումները պայմանավորված են ոչ թե քաղաքականությամբ, այլ հայտնաբերված խախտումներով

«Ռոսսելխոզնադզոր»-ի կողմից Հայաստանից որոշ սննդամթերքի ներմուծման սահմանափակումները պայմանավորված են ոչ թե քաղաքականությամբ, այլ հայտնաբերված խախտումներով։ Այս մասին «Ռոսիյսկայա գազետա»-ին տված հարցազրույցում հայտարարել է գերատեսչության ղեկավար Սերգեյ Դանկվերտը, գրում է ՏԱՍՍ-ը։

Նա նշել է, թե չի տեսել որևէ նախագահի, որ ասի, որ սահմանափակումները քաղաքականացված չեն։

«Այս դեպքում մենք խոսում ենք բոլորովին այլ բանի մասին։ Կա ձեռնարկությունների հետ աշխատանքի երկար պատմություն, մատակարարումների և հայտնաբերված խախտումների վերաբերյալ տվյալներ, ինչպես նաև լաբորատոր փորձարկումների արդյունքներ»,- ասել է Դանկվերտը։

Նրա պնդմամբ՝ Հայաստանի խնդիրն արտադրության կազմակերպումն ու վերահսկողությունն է։ Մասնավորապես, Դանկվերտը նշել է, թե այնտեղ կան մեծ թվով մանր ֆերմերներ, որոնք աճեցնում և արտահանում են իրենց արտադրանքը։

«Սակայն գործնականում ներքին վերահսկողություն կամ համագործակցություն չկա արտադրության և փոխադրման միջև: Հազարավոր փունջ կանաչի է հավաքվում մեկ մեքենայում, որից հետո կարգավորող մարմինները պետք է ստուգեն արտադրանքի հսկայական ծավալները: Դա ֆիզիկապես անհնար է»,- ասել է գերատեսչության ղեկավարը։

Դանկվերտն ընդգծել է, թե արտադրանքի վերահսկողությունը պետք է իրականացվի անմիջապես արտադրության փուլում։ Նա հավելել է, որ, ի թիվս այլ բաների, համակարգի արդյունավետ գործունեության համար անհրաժեշտ են արտադրողների միությունների համագործակցությունը, արտադրության վերահսկողությունը և պատասխանատվությունը։

«Սա հենց այն է, ինչ այսօր բացակայում է։ Հետևաբար, սահմանափակումների պատճառները  արտադրանքի որակի և անվտանգության ոլորտում են, այլ ոչ թե քաղաքականության»,- եզրափակել է նա։

Հիշեցնենք, որ մայիսի վերջից Ռուսաստանը սահմանափակել է Հայաստանից ծաղիկների, լոլիկի, վարունգի, պղպեղի, կանաչ բանջարեղենի և ելակի, կորիզավոր մրգերի, խաղողի, սմբուկի, կարտոֆիլի և չորացրած մրգերի ներմուծումը։ Հունիսի 2-ից սկսած՝ Հայաստանը պարտավոր էր կասեցնել Ռուսաստան արտահանման համար նախատեսված կենդանի ձկան հավաստագրումը։

Մինչ այդ, Հայաստանն արտահանումը դիվերսիֆիկացնելու տարբերակներ է մշակում։

Թարգմանությունը՝ Էմմա Չոբանյանի