«Մենք խաղեր չենք խաղում». Զելենսկին հրաժարվել է Մոսկվա գնալ Պուտինի հետ բանակցելու

Ուկրաինայի նախագահ Վլադիմիր Զելենսկին մերժել է ՌԴ նախագահ Վլադիմիր Պուտինի հետ Մոսկվայում հանդիպելու՝ Կրեմելի առաջարկը։ Նա նաև նշել է այն երկրները, որտեղ կարող են բանակցություններ տեղի ունենալ, հաղորդում է ՌԲԿ Ուկրաիան։

Զելենսկին հայտարարել է՝ Ուկրաինան «չի խաղում այդ խաղերը»։ Նա շեշտել է, որ հանդիպումը կարող է տեղի ունենալ չեզոք երկրում։ Ըստ Զելենսկիի՝ դա կարող է լինել Շվեյցարիան, Թուրքիան կամ Մերձավոր Արևելքի որևէ երկիր, միաժամանակ, հավելել է, որ «Պուտինը չի ցանկանում, որ պատերազմն ավարտվի»։

ԱՄՆ-ի միջնորդությամբ Ռուսաստանի հետ բանակցությունների վերսկսման հնարավոր ամսաթվի մասին հարցին Զելենսկին պատասխանել է, որ նման քննարկումներ կազմակերպելը «շատ դժվար է»։ Նա նշել է, որ ցանկանում էր օգտվել G7-ի գագաթնաժողովից՝  Պուտինի հետ հանդիպելու համար, բայց «Ռուսաստանը չի կիսում այս տեսակետը»։

«Ես վստահ չեմ, որ նրանք դրական ազդանշաններ են ստացել Միացյալ Նահանգներից»,- ասել է Ուկրաինայի նախագահը։

Զելենսկին պատմել է, թե ինչպես է Ֆրանսիայի նախագահ Էմանուել Մակրոնին առաջարկել՝ փորձել հանդիպում կազմակերպել ռուսների հետ Շվեյցարիայում։ Սակայն նա նշել է, որ ռուսները չեն արձագանքել այս առաջարկին։

«Պուտինը չօգտվեց այս հնարավորությունից՝ հանդիպելու G7-ի ժամանակ։ Մենք խոսել ենք նախագահ Թրամփի հետ։ Կարծում եմ՝ այո, գիտեմ, որ նա կրկին բազմաթիվ առաջարկներ է արել տարբեր առաջնորդների միջոցով, նկատի ունեմ Պուտինին,, գնալ Մոսկվա»,- ասել է նա։

Նշենք, որ Զելենսկին և Թրամփը քննարկել են ԱՄՆ տարածքում Պուտինի հետ հանդիպում անցկացնելու հնարավորությունը։

Թարգմանությունը՝ Էմմա Չոբանյանի