Քաղաքական որոշում կա՝ բոլոր հնարավոր միջոցներով այնպես անել, որ ԲՀԿ-ն չհայտնվի ԱԺ-ում. Էլինար Վարդանյան․ ՏԵՍԱՆՅՈՒԹ

«Անվավեր ճանաչելու լիազորություն արդյո՞ք ուներ Կենտրոնական ընտրական հանձնաժողովը. իհարկե, ընտրական օրենսգիրքը այդպիսի հնարավորություն տալիս է։ Բայց միևնույն ժամանակ ընտրական օրենսգիրքը պահանջում է, որպեսզի տրվի գնահատական, թե արդյոք անվավեր ճանաչելու արդյունքում ազդեցություն ունենալու է ընտրության արդյունքների վրա։ Այսինքն՝ երեկ Կենտրոնական ընտրական հանձնաժողովը, դեռ չունենալով վերջնական պատկերը, անվավեր է ճանաչում ընտրությունների արդյունքները երկու ընտրական տեղամասում՝ միևնույն ժամանակ չտալով գնահատական արդյունքների վրա ազդեցության հետ կապված»,- հրավիրված մամուլի ասուլիսի ժամանակ ասաց ԲՀԿ ցուցակի պատգամավորի թեկնածու Էլինար Վարդանյանը։

Հիշեցնենք՝ երեկ գիշեր Կենտրոնական ընտրական հանձնաժողովն արտահերթ նիստի ընթացքում որոշում կայացրեց անվավեր ճանաչել Երևանի 10/51 և Սյունիքի մարզի 35/65 ընտրատեղամասերի քվեարկությունների արդյունքները։

Այս երկու ընտրատեղամասերում ԲՀԿ-ն ընդհանուր ուներ 213 քվե։ Վարդանյանի խոսքով՝ մեծ է անհանգստությունը, որ Կենտրոնական ընտրական հանձնաժողովը կարող է այդ երկու ընտրատեղամասերում վերաքվեարկություն որոշում չկայացնել։

«Մենք խոսում ենք իրավական գործընթացների մասին, բայց ակնհայտ է, որ այստեղ բացառապես քաղաքական որոշում է, և քաղաքական որոշման նպատակն այն է, որպեսզի բոլոր հնարավոր միջոցներից օգտվել, որ «Բարգավաճ Հայաստան» կուսակցությունը չհայտնվի Ազգային ժողովում, իսկ դա այսօր այս իշխանության համար, իհարկե, կենսական խնդիր է կայանում։ 101-րդ հոդվածը խոսում է այն մասին, որ եթե վերաքվեարկության արդյունքները այնուամենայնիվ չեն վերացնում ուժերի նկատմամբ ազդեցությունը, ապա կարող է Ազգային ժողովի անվավերության հետ կապված որոշում կայացնել։ Հետևաբար, այո, հետևանքները կարող են գնալ ընդհուպ մինչև Ազգային ժողովի ընտրությունների անվավեր ճանաչելը»,- ասաց Վարդանյանը։

Մանրամասները՝ տեսանյութում։