Ուկրաինական ԱԹՍ-ների հարձակման հետևանքով Թաթարստանում նավթավերամշակման, Սամարայում` քիմիական գործարան է հրդեհվել

Հունիսի լույս 12-ի գիշերը անօդաչու թռչող սարքերը հարձակվել են ՌԴ Սամարայի մարզի «Տոլյատիկաուչուկ» քիմիական գործարանի և Թաթարստանի «Տանեկո» նավթավերամշակման գործարանի վրա, գրում է Current time-ը։

Սամարայի մարզային իշխանությունները գիշերը զգուշացրել են անօդաչուների հարվածների մասին։ Նահանգապետ Վյաչեսլավ Ֆեդորիշչևը հայտարարել է, որ Ուկրաինայի զինված ուժերը փորձել են հարձակվել տարածաշրջանի վրա, սակայն ոչ ոք չի տուժել։

Ուկրաինական Exilenova+ և Supernova+ տելեգրամ ալիքները հայտնել են սինթետիկ կաուչուկ արտադրող «Տոլյատիկաուչուկ» գործարանի վրա հարվածի  մասին։ Այն ապահովում է ռուսական շուկայի մեկ քառորդ մասը։

Supernova+-ի տվյալներով էլ՝ Նիժնեկամսկում այրվում է «Տատնեֆտ» խմբի մաս կազմող «Տանեկո» նավթավերամշակման գործարանը։ Տելեգրամ ալիքները հրապարակում են նաև Նիժնեկամսկում բազմահարկ շենքի տեսանյութեր, որտեղ մի քանի բնակարաններ են վնասվել։

Թաթարստանի ղեկավար Ռուստամ Միննիխանովը հայտնել է, որ հարձակման հետևանքով տուժած ձեռնարկություններն արագորեն վերացնում են հետևանքները։ Արտադրական գործընթացները չեն դադարեցվել։

Անօդաչու թռչող սարքերից մեկը հարվածել է բնակելի շենքի, որի հետևանքով վիրավորվել է երեք մարդ։ Բնակիչները տարհանվել են։ Այժմ մոտակա ճամբարում պատրաստվում է ժամանակավոր կացարան։

Ռուսաստանի Պաշտպանության նախարարությունը հայտարարել է, որ Աստրախանի, Բելգորոդի, Բրյանսկի, Վորոնեժի, Կալուգայի, Կուրսկի, Լիպեցկի, Ռոստովի, Սամարայի, Սարատովի, Սմոլենսկի, Տուլայի, Ուլյանովսկի մարզերի, Թաթարստանի, Մոսկվայի մարզի և բռնակցված Ղրիմի վրա գիշերը խոցվել է 231 անօդաչու թռչող սարք։

Թարգմանությունը՝ Էմմա Չոբանյանի