16.08.2026 | 18:49
Հունգարիայում լեհական ավտոբուսի վթարի հետևանքով 12 զբոսաշրջիկ է զոհվել
Կայա Կալլասը կարող է լքել պաշտոնը․ Ֆրանսիան և Գերմանիան ցանկանում են բարեփոխել ԵՄ դիվանագիտական ծառայությունը․ FT
Քաղաքականություն
11.06.2026 | 18:44
Ֆրանսիայի և Գերմանիայի կառավարությունները քննարկում են 15 տարի առաջ ստեղծված ԵՄ դիվանագիտական ծառայությունը բարեփոխելու տարբերակներ՝ աշխարհաքաղաքական ճգնաժամերին դաշինքի արձագանքի արդյունավետությունը բարձրացնելու նպատակով։ Այս մասին հաղորդում է Financial Times-ը, փոխանցում է Meduza-ն։
Հինգ աղբյուրների համաձայն՝ տարբերակներից մեկը եվրոպական դիվանագիտության ղեկավար Կայա Կալլասին պաշտոնից ազատելն ու նրա ղեկավարած Եվրոպական արտաքին գործողությունների ծառայությանը (EEAS) տարեկան մեկ միլիարդ եվրո բյուջեից զրկելն է։ Այդ դեպքում այս լիազորությունները կվերադարձվեն Եվրոպական հանձնաժողովին ու ԵՄ անդամ պետություններին։
«Ակնհայտ է, որ [EEAS-ը] այսօրվա աշխարհում չի աշխատում այնպես, ինչպես պետք է։ Այն անգործունակ է։ Խնդիրը կառուցվածքային է, ինչը նշանակում է, որ կառույցն ինքնին պետք է վերակառուցվի»,- ասել է FT-ի աղբյուրներից մեկը։
Մասնավոր զրույցներում եվրոպական երկրների ներկայացուցիչները նշում են, որ Եվրոպական արտաքին գործերի ծառայության, ազգային արտաքին գործերի նախարարությունների և Եվրոպական հանձնաժողովի ու Խորհրդի արտաքին հարաբերությունների վարչությունների գործառույթները համընկնում են, նաև համակարգվածության պակաս կա։ Այս բողոքները սրվել են այն փաստի պատճառով, որ Կայա Կալլասը, որոշների կարծիքով, «չափազանց հաճախ է արտահայտում իր սեփական տեսակետները ԵՄ-Չինաստան հարաբերությունների նման հարցերի վերաբերյալ և առաջ է քաշում առաջարկներ, որոնք դեռևս չեն հաստատվել եվրոպական մայրաքաղաքների կողմից»։
Պաշտոնյաները, սակայն, ընդգծում են, որ հնարավոր բարեփոխումների տարբերակների վերլուծությունը դեռևս նախնական բնույթ է կրում։ Կալլասի ներկայացուցիչը Financial Times-ին ասել է, որ եվրոպական դիվանագիտության ղեկավարն «ամբողջությամբ կենտրոնացած է իր մանդատը կատարելու վրա», և Եվրոպական արտաքին գործողությունների ծառայության հետագա ամրապնդումն այդ աշխատանքի կարևոր մաս է կազմում:
Թարգմանությունը՝ Էմմա Չոբանյանի
