Աշխարհացունց բան չի լինի, բայց անհետևանք էլ չի մնա. ՀԾԿՀ նախագահը` գազի գնի թանկացման մասին․ ՏԵՍԱՆՅՈՒԹ

«Հայաստանի Հանրապետությունում էլեկտրական էներգիայի արտադրության մոտ 30-35 տոկոսը՝ կախված տարվա կառուցվածքից, արտադրվում է ջերմային էլեկտրակայաններում։ Եվ, հետևաբար, եթե գազի գինը կթանկանա X դրամով կամ Y անգամ (ես անձամբ՝ որպես հանձնաժողովի նախագահ, իմ սեղանին չունեմ նման թիվ դրված պաշտոնապես և չկա նման քննարկում), նշածս տոկոսի չափով ազդեցությունը էլեկտրական էներգիայի արտադրության սակագնի վրա, բնականաբար, կլինի բացասական»,- ԱԺ-ում լրագրողների հետ ճեպազրույցում ասաց Հանրային ծառայությունները կարգավորող հանձնաժողովի նախագահ Մեսրոպ Մեսրոպյանը` անդրադառնալով ռուսական գազի հնարավոր թանկացմանը:

Մեսրոպյանը վտահեցրեց, որ դա, այնուամենայնիվ, չի հանգեցնի 1990-ականներին բնորոշ երկարատև հոսանքազրկումների։

«Աշխարհացունց բան, այնուամենայնիվ, դրանից տեղի չի ունենա, որովհետև արևային տեխնոլոգիաները, վերականգնվող էներգետիկան այս տարիների ընթացքում մեր երկրում, բարեբախտաբար, բավական զարգացել են առաջանցիկ տեմպերով։ Եվ միայն արդեն արևային կայանների գոյությունը մեր իրականության մեջ մեզ կապահովագրի 92-93-94 թվականների ծանր էներգետիկական ճգնաժամի պատկերը ունենալուց։ Այո՛, անցումային փուլում, եթե կլինի գազի թանկացում, որոշակի դժվարություններ, ենթադրաբար, կլինեն, բայց դա չի լինի հովհարային անջատումների տարիների այդ պատկերը չենք ունենա` այդպես ծանր և խորը»,- ասաց Մեսրոպյանը:

Նա ընդգծեց, որ այս պահին գազի սակագնի փոփոխության վերաբերյալ որևէ պաշտոնական առաջարկ չկա։ Ըստ Մեսրոպյանի՝ գործող պայմանագրերն ուժի մեջ են մինչև 2027 թվականի սկիզբը, ուստի առաջիկա ամիսներին ցնցումային զարգացումներ չեն ակնկալվում։

«Եթե սակագնի փոփոխության առաջարկությամբ հանդես չի գալիս «Գազպրոմ Արմենիա»-ն, մենք մեր նախաձեռնությամբ գազի թանկացման առաջարկով հանդես չենք գա»,- նշեց նա։

Անդրադառնալով գազի ներմուծման այլընտրանքային աղբյուրներին՝ Մեսրոպյանը նշեց, որ տեսականորեն հնարավոր են տարբեր տարբերակներ՝ այն երկրներից, որոնք գազ են արտահանում և որոնց հետ առկա ենթակառուցվածքները թույլ կտան իրականացնել մատակարարումներ։

Մանրամասները` տեսանյութում:

Արփի Հակոբյան