11.06.2026 | 14:55
«Ի՞նչը հերքեմ»․ Իվետա Մուկուչյանի արձագանքը Փաշինյանի հայտարարություններին
Օմանի ափերին լցանավի վրա ԱՄՆ-ի հարձակման հետևանքով 3 հնդիկ նավաստիներ են մահացել
Քաղաքականություն
11.06.2026 | 13:52
Չորեքշաբթի Օմանի ծոցում Իրանի հետ կապված նավթատար լցանավի վրա ԱՄՆ-ի հարվածից հետո երեք հնդիկ նավաստիներ են մահացած։ Ըստ CNN-ի՝ այս մասին հայտնել է Հնդկաստանի նավահանգիստների, նավագնացության և ջրային ուղիների նախարար Սարբանանդա Սոնովալը
«Խորապես ցավալի է իմանալ Պալաուի դրոշի ներքո նավարկող MT Settebello նավի վրա տեղի ունեցած ողբերգական միջադեպի մասին։ Ցավոք, երեք հնդիկ ծովագնացներ, որոնց հետ կապված նախապես հայտարարվել էր, որ նրանք անհետ կորած են, այժմ հաստատվել են որպես մահացած։ Նրանց մարմինները հայտնաբերվել և նույնականացվել են։ Սա ծանր կորուստ է մեր ծովային ընտանիքի համար»,- գրել է նա X-ում։
Նշվում է, որ ԱՄՆ-ի կողմից նավի վրա հարվածը կարող է լարվածություն առաջացնել Նյու Դելիի և Վաշինգտոնի հարաբերություններում, որոնք վերջին մեկ տարվա ընթացքում որոշակի լարվածություն են ապրել։
Հնդկաստանն արդեն դատապարտել է Պալաուի դրոշի ներքո նավարկող M/T Settebello նավի վրա հարձակումը Օմանի նեղուցով անցնելիս։ Նյու Դելին նաև կանչել է ԱՄՆ գործերի ժամանակավոր հավատարմատարին՝ բողոք ներկայացնելու համար, հայտնում են Հնդկաստանի արտաքին գործերի նախարարության աղբյուրները։
Միջադեպի պահին նավում եղել է անձնակազմի 24 անդամ, որոնցից 21-ը փրկվել է։
Սոնովալը հանձնարարել է պաշտոնյաներին «ապահովել անձնակազմի փրկված անդամների անհապաղ հայրենադարձումը և մահացածների աճյունների վերադարձը»։
ԱՄՆ Կենտրոնական հրամանատարությունը հայտարարել է, որ ամերիկյան ինքնաթիռը «ճշգրիտ զինամթերքով է կրակել նավի շարժիչային սենյակի վրա, այն բանից հետո, երբ անձնակազմը բազմիցս չի կատարել ամերիկյան ուժերի հրահանգները»։
Նշվում է, որ նավը կանգնեցվել է իրանական նավթ տեղափոխող նավերի նկատմամբ շարունակական շրջափակման շրջանակում։
ԱՄՆ ուժերը, ապրիլի 13-ին սկսված շրջափակումից ի վեր, շարքից հանել են 8 «անհամապատասխան նավ», ուղղորդել 134 նավ և թույլ են տվել 42 մարդասիրական օգնության նավերի անցումը։
Թարգմանությունը՝ Էմմա Չոբանյանի
