Հռոմի պապն օծել է Բարսելոնայի Սագրադա Ֆամիլիա տաճարի նոր աշտարակը․ այն այժմ աշխարհի ամենաբարձր եկեղեցին է․ ՏԵՍԱՆՅՈՒԹ

Բարսելոնայում ավարտվել է Սագրադա Ֆամիլիայի բազիլիկի կենտրոնական և ամենաբարձր՝ Հիսուս Քրիստոսի աշտարակի կառուցումը, որը տևել է ավելի քան 140 տարի։ Խաչի տեղադրմամբ տաճարի նախագծային բարձրությանը հասել է 172,5 մետրի, ինչն այն դարձնում է աշխարհի ամենաբարձր քրիստոնեական եկեղեցին, գրում է The Insider-ը։

Հունիսի 10-ին՝ ճարտարապետ Անտոնի Գաուդիի մահվան 100-ամյակի առթիվ, Հռոմի պապ Լևոն XIV-ը հանդիսավոր կերպով օծել է նոր աշտարակը։ Արարողությանը ներկա են եղել նաև Իսպանիայի թագավոր Ֆելիպե VI-ը, թագուհի Լետիցիան, վարչապետ Պեդրո Սանչեսը և հազարավոր ուխտավորներ ու զբոսաշրջիկներ։

Լուսային շոուն սկսվել է աշտարակի հիմքից և աստիճանաբար բարձրացել մինչև գագաթին գտնվող խաչը։ Ամենահիշարժան իրադարձությունն անօդաչու թռչող սարքի միջոցով լուսային շոուն է եղել. երկնքում հայտնվել է Գաուդիի ուրվագիծը՝ նրա հայտնի արտահայտության հետ միասին. «Նախ սեր, հետո՝ տեխնոլոգիա»։

Նախկինում աշխարհի ամենաբարձր տաճարի տիտղոսը պատկանում էր Գերմանիայի Ուլմի տաճարին (162,9 մետր): Սագրադա Ֆամիլիան այն գերազանցել էր 2025 թվականին, բայց վերջնական բարձրությանը հասել է միայն վերջին տարրի՝ Հիսուս Քրիստոսի աշտարակի վրա խաչի տեղադրումից հետո։

Սագրադա Ֆամիլիայի շինարարությունը սկսվել է 1882 թվականին: Մեկ տարի անց երիտասարդ Անտոնի Գաուդին գլխավորել է նախագիծը՝ ամբողջությամբ վերափոխելով սկզբնական նախագիծը: Ճարտարապետի մահից հետո՝ 1926 թվականին, աշխատանքները բազմիցս ընդհատվել են ֆինանսավորման պակասի, Իսպանիայի քաղաքացիական պատերազմի, որոշ գծագրերի և մոդելների ոչնչացման, իսկ 21-րդ դարում՝ COVID-19-ի համավարակի պատճառով:

Գաուդին կենտրոնական աշտարակը մտածել էր որպես ամբողջ համալիրի կենտրոնական կետ։ Այն գտնվում է բազիլիկի կենտրոնում և շրջապատված է Ավետարանիչների ու Մարիամ Աստվածածնի աշտարակներով։ Ճարտարապետը դիտավորյալ սահմանափակել է կառույցի բարձրությունը մինչև 172,5 մետր՝ կես մետր ցածր մոտակա Մոնժուիկ բլրից։ Նա կարծում էր, որ մարդու արարչագործությունը չպետք է գերազանցի Աստծո արարչագործությանը։

Չնայած կենտրոնական աշտարակի կառուցման ավարտին՝ բազիլիկը դեռևս ամբողջական չէ։ Առաջիկա տարիներին նախատեսվում է ավարտել Հիսուս Քրիստոսի աշտարակի ներքին հարդարանքը և շարունակել աշխատանքները Փառքի ճակատի՝ եկեղեցու գլխավոր մուտքի վրա։ Նախագծի ղեկավարները գնահատում են, որ շինարարության ավարտը կարող է տևել ևս մի քանի տարի։

Այնուամենայնիվ, Հիսուս Քրիստոսի աշտարակի կառուցման ավարտը համարվում է Սագրադա Ֆամիլիայի պատմության գլխավոր հանգրվանը։ Իր գոյության ավելի քան մեկ դարի ընթացքում տաճարն առաջին անգամ հասել է այն բարձրությանն ու ուրվագծին, որը Գաուդին պատկերացրել էր դեռևս 20-րդ դարի սկզբին։

Թարգմանությունը՝ Էմմա Չոբանյանի