Օսիպյանն ազատ է արձակվել «Նուբարաշեն» ՔԿՀ-ից

Արցախցի գորիչ Արթուր Օսիպյանն ազատ է արձակվել «Նուբարաշեն» քրեակատարողական հիմնարկից։

Ավելի վաղ Քաղաքացիական հասարակության մի խումբ ներկայացուցիչների կողմից ներկայացված երաշխավորությունների հիման վրա հսկող դատախազը որոշել է վերացնել Արթուր Օսիպյանի նկատմամբ կիրառված կալանքը։ ՀՀ գլխավոր դատախազության հաղորդմամբ՝ որոշումն արդեն ուղարկվել է «Նուբարաշեն» քրեակատարողական հիմնարկ՝ նրան անհապաղ ազատ արձակելու նպատակով։

Հիշեցնենք, որ Արաբկիրում «Քաղաքացիական պայմանագիր» կուսակցության քարոզարշավի ժամանակ միջադեպ էր տեղի ունեցել Նիկոլ Փաշինյանի և Արթուր Օսիպյանի միջև․ բանավեճին հաջորդել էին վիրավորական արտահայտություններ։ Փաշինյանը նախ Օսիպյանին «փախած» էր անվանել, ապա նաև հարց բարձրացրել, թե ինչու չի զոհվել արցախյան պատերազմում։ Միջադեպից հետո Օսիպյանը ձերբակալվեց, ապա երկու ամսով կալանավորվեց։ Արցախցի գործիչը ձերբակալման օրվանից հացադուլ է հայտարարել։ Երեկ էլ նրա փաստաբանը տեղեկացրեց, որ Օսիպյանը հրաժարվել է բժշկական զննությունից:

«Ընդհանրապես արդեն հացադուլավորների մոտ մահվան վտանգ է լինում, երբ անցնում է 14-օրյա շեմը։ Այդ ժամանակ արդեն կյանքը ցանկացած պահի կարող է դադարել»,- մեզ հետ զրույցում ասել էր փաստաբան Դավիթ Հովհաննիսյանը: Հացադուլը դադարեցնելու հորդորներին ի պատասխան՝ Օսիպյանն ավելի վաղ հայտարարել է, որ կդադարեցնի այն ժամանակ, երբ Փաշինյանը ներողություն խնդրի իրենից։ Վարչապետը մայիսի 28-ին, պատասխանելով Factor TV-ի հարցին, արդյոք պատրաստվում է ներողություն խնդրել Արթուր Օսիպյանից, հայտարարեց՝ նա՛ պետք է ներողություն խնդրի։ Քաղաքացիական հասարակության մի շարք ներկայացուցիչներ ու իրավապաշտպաններ հայտարարում են, որ Օսիպյանի կալանավորման հիմքեր չկան և որ նա քաղբանտարկյալ է: Նրանք նաև երաշխավորագրեր են ներկայացրել Օսիպյանի ազատ արձակման պահանջով: Հավելենք, որ օրերս էլ ԱԽ քարտուղար Արմեն Գրիգորյանը, պատասխանելով Արթուր Օսիպյանի վերաբերյալ Factor TV-ի հարցին, նշել էր, որ ծանոթ են խնդրին, աշխատում են այդ ուղղությամբ և հույս ունեն, որ հանգուցալուծում կլինի:

Լուսանկարը՝ Միքայել Մարգարյանի ֆեյսբուքյան էջի տեսանյութից