Պիերո Աուիզիլիո․ «Մխիթարյանը կմնա «Ինտերում»»

Իտալական «Ինտերի» մարզական տնօրեն Պիերո Աուիզիլիոն հաստատել է, որ Հայաստանի ազգային հավաքականի նախկին ավագ Հենրիխ Մխիթարյանը երկարաձգելու է գործող պայմանագիրն ակումբի հետ։

«Իմ ամբողջ կարիերայի ընթացքում ես հանդիպել եմ միայն մեկ ֆուտբոլիստի, որն ինքնուրույն է զբաղվում իր բոլոր հարցերով։ Նա միջինից բարձր մակարդակի վրա է թե՛ խաղադաշտում, թե՛ դրա սահմաններից դուրս։ Հայ ֆուտբոլիստը սլանում է գնացքի պես, նա կմնա «Ինտերում»»,- Պիերո Աուզիլիոյի խոսքը մեջբերում է La Gazzetta dello Sport-ը։

Սպասվում է, որ 37-ամյա կիսապաշտպանը մեկ տարով է երկարաձգելու գործող պայմանագիրը, որն ավարտվում է հունիսի 30-ին։ Հայաստանի հավաքականի պատմության լավագույն ռմբարկուն 2022 թվականից է խաղում «Ինտերում», որի կազմում 2-ական անգամ դարձել է Իտալիայի չեմպիոն, գավաթակիր, սուպերգավաթակիր ու երկու անգամ խաղացել է Չեմպիոնների լիգայի եզրափակիչում։ Վերջերս Հենրիխ Մխիթարյանը նվաճել էր կարիերայի 28-րդ տիտղոսը։ Ավարտված մրցաշրջանում հայ կիսապաշտպանը մասնակցել է 39 հանդիպման, դարձել 4 գոլի ու 3 գոլային փոխանցման հեղինակ։

Կարիերայի ընթացքում Հենրիխ Մխիթարյանը հանդես է եկել նաև Երևանի «Փյունիկում» (2006-2009 թթ.), Դոնեցկի «Մետալուրգում» (2009-2010 թթ.) ու «Շախտյորում» (2010-2013 թթ.), Դորտմունդի «Բորուսիայում» (2013-2016 թթ.), անգլիական «Մանչեսթեր Յունայթեդում» (2016-2018 թթ.) ու «Արսենալում» (2018-2019 թթ.), իտալական «Ռոմայում» (2019-2022 թթ.)։