22.10.2026 | 22:20
Կասեցվել է «Աշտարակ միլկ»-ի երկու արտադրատեսակների արտադրությունը
Ֆիլիպիններում երկրաշարժի հետևանքով զոհերի թիվը հասել է 41-ի
Քաղաքականություն
09.06.2026 | 18:36
Ֆիլիպինների Մինդանաո կղզում երկուշաբթի տեղի ունեցած 7,8 մագնիտուդով երկրաշարժից հետո, ըստ ազգային և տեղական աղետների գործակալությունների, հազարավոր մարդիկ մնացել են անօթևան, ավելի քան 450 մարդ վիրավորվել է, չորս մարդ համարվում է անհետ կորած, գրում է France 24-ը:
Ամենաշատը տուժած Սարանգանի նահանգում որոշ տարածքներ հասանելի են մնում միայն ուղղաթիռով, մինչդեռ հետցնցումների վախը դանդաղեցնում է փրկարարական աշխատանքները, լրագրողներին ասել են տեղական պաշտոնյաները։
«Դեռևս կան հետցնցումներ, ուստի փրկարարները շատ զգույշ են իրենց մոտեցման հարցում։ Սա մարտահրավեր է»,- ասել է տարածաշրջանային քաղաքացիական պաշտպանության ղեկավար Ռոդրիգո Սոսմենան։
Առաջին երկրաշարժից շուրջ երկու ժամ անց տարածքում տեղի են ունեցել մի շարք հզոր հետցնցումներ, որին հաջորդել են հարյուրավոր փոքր ցնցումներ։ Երեքշաբթի կեսօրվա դրությամբ, ըստ AFP-ի նահանգային աղբյուրների, զոհերի թիվը հասել է 41-ի։
AFP-ի հետ զրուցած բնակիչները նկարագրել են երկրաշարժի ժամանակ տեղի ունեցած սարսափելի տեսարանները, որոնցից շատերն ասել են, որ այդ տարածքը այլևս բավականաչափ անվտանգ չէ տուն կոչելու համար։
Թարգմանությունը՝ Էմմա Չոբանյանի
