28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
ՀՀ-ն, Ադրբեջանն ու Թուրքմենստանը կարող են միգրացիոն ճգնաժամի բախվել․ ԱՊՀ հակաահաբեկչական կենտրոնի ղեկավար
Քաղաքականություն
09.06.2026 | 17:15
Իրանի շուրջ իրավիճակի հետագա սրման ռիսկը կարող է բացասական հետևանքներ ունենալ ԱՊՀ երկրների, մասնավորապես, Իրանին սահմանակից երկրների համար։ Այս մասին հայտարարել է ԱՊՀ հակաահաբեկչական կենտրոնի ղեկավար Եվգենի Սիսոևը՝ Մոսկվայում բացված ԱՊՀ անդամ պետությունների՝ ահաբեկչության դեմ պայքարի համար պատասխանատու իրավասու մարմինների բաժինների ղեկավարների և հակաահաբեկչական գործունեությունը համակարգող ազգային կառույցների ղեկավարների 19-րդ հանդիպման ժամանակ։
«Մեր հանդիպումը տեղի է ունենում միջազգային իրավիճակի կտրուկ վատթարացման ֆոնին։ Առանցքային արտաքին գործոնը, անկասկած, Մերձավոր Արևելքում տեղի ունեցող իրադարձություններն են»,- նշել է Սիսոևը։
Նա ասել է, թե Վաշինգտոնի կողմից աջակցվող Իսրայելի ագրեսիան Պաղեստինի դեմ սրվել է Իրանի դեմ ԱՄՆ-Իսրայել ռազմական արշավի պատճառով՝ «դառնալով վերջին տարիներին ամբողջ միջազգային անվտանգության համակարգի համար ամենալուրջ մարտահրավերը»։
«Էներգակիրների և հանքանյութերի համաշխարհային մատակարարումների արգելափակումը, կարևորագույն ենթակառուցվածքների վրա հարձակումները և հետագա սրման ռիսկը նախադրյալներ են ստեղծում լայնածավալ աղետի համար և կարող են առաջացնել հզոր միգրացիոն հոսքեր, Լիբիայի և Իրաքի նման մարդասիրական ճգնաժամ։ ԱՊՀ բոլոր երկրները, մասնավորապես, Իրանին սահմանակից Ադրբեջանը, Հայաստանը և Թուրքմենստանը, կարող են բախվել դրա հետևանքներին»,- հայտարարել է նա։
Բացի այդ, նաև հիշեցրել է, որ Սիրիան պահպանում է ահաբեկչական ակտիվության ամենախոշոր օջախներից մեկի կարգավիճակը, որտեղ շարունակվում է զինված հակամարտությունը իշխանությունների և ԻԼԻՊ-ի գլխավորած ահաբեկչական կառույցների միջև։
Թարգմանությունը՝ Էմմա Չոբանյանի
