Մերձմոսկվայում մեքենա է պայթեցվել․ վարորդը զոհվել է

ՌԴ Քննչական կոմիտեն հայտնել է, որ Մոսկվայի մարզի Բալաշիխա քաղաքում BMW մակնիշի մեքենա է պայթել, որի հետևանքով վարորդը զոհվել է։ Meduza-ի հաղորդմամբ՝ պայթյունը տեղի է ունեցել տեղական ժամանակով 5:30-ի սահմաններում՝ Ավիատորների թաղամասի Կոլդունով փողոցում։ Քննչական կոմիտեն հայտարարել է, որ պայթուցիկ սարքը գործի է դրվել մեքենայի ընթացքի ժամանակ։ Վարորդը բազմաթիվ վնասվածքներ է ստացել և տեղում մահացել։

Քրեական գործ է հարուցվել, սակայն չի նշել, թե ինչ հոդվածներով։

Անվտանգության ուժերի հետ կապված Mash տելեգրամ ալիքը հայտնել է, որ պայթյունը տեղի է ունեցել, երբ վարորդը մեքենա է նստել։ Նրա ինքնությունը չի հաղորվում։ Ավելի ուշ «Կոմերսանտ»-ը, հղում անելով աղբյուրներին, հայտնել է, որ մեքենայի թափքի տակ պայթել է մինչև 500 գրամ տրոտիլի հզորությամբ ինքնաշեն պայթուցիկ սարք։

2025 թվականի ապրիլին նույն թաղամասում պայթել էր մեքենա, որի հետևանքով զոհվել էր Ռուսաստանի զինված ուժերի գլխավոր շտաբի գլխավոր օպերատիվ վարչության պետի տեղակալ, գեներալ Յարոսլավ Մոսկալիկը։ Տեղի բնակիչները հայտնել էին, որ տարածքում զինվորականներ են բնակվում։

Պայթյունից մեկ օր անց ԱԴԾ-ն հայտարարել էր ահաբեկչության կատարող Իգնատ Կուզինի ձերբակալության մասին՝ նրան անվանելով «ուկրաինական հատուկ ծառայությունների գործակալ»։ Հայտնի է, որ նա ունի Ուկրաինայում բնակության թույլտվություն։ ԱԴԾ-ի տվյալներով՝ Կուզինն է ռումբը տեղադրել մեքենայում։ 2025 թվականի նոյեմբերին Կուզինը դատապարտվել է ցմահ ազատազրկման։

Թարգմանությունը՝ Էմմա Չոբանյանի