24.10.2026 | 19:14
Վթար Արենի բնակավայրի մոտ. փրկարարները հատուկ տեխնիկայի միջոցով վարորդին դուրս են բերել ավտոմեքենայից
ՌԴ-ն զանգվածային հարված է հասցրել Խարկովին և Չուգուևին․ զոհվել է 3, վիրավորվել՝ 18 մարդ
Քաղաքականություն
09.06.2026 | 14:58
Ռուսաստանը հունիսի լույս 9-ի գիշերը հարձակվել է Ուկրաինայի վրա երկու X-59/69 հրթիռներով և 166 անօդաչու թռչող սարքերով: Հակաօդային պաշտպանության ուժերը խոցել են դրանցից 146-ը, հայտնել են Ուկրաինայի ռազմաօդային ուժերը, գրում է Current time-ը։
Խարկովի քաղաքապետ Իգոր Տերեխովը հայտնել է, որ ռուսական ուժերը զանգվածային ավիահարված են հասցրել քաղաքին։ Վիրավորվել է 15 մարդ, այդ թվում՝ 2 երեխա: Խարկովի տարածաշրջանային ռազմական վարչակազմի ղեկավար Օլեգ Սինեգուբովը պարզաբանել է, որ բժիշկներն օգնություն են ցուցաբերել 3 երեխայի, այդ թվում՝ մեկ տարեկան տղայի։
Հարձակման հետևանքով վնասվել են բնակելի շենքեր, բիզնես կենտրոն, վարչական և արդյունաբերական շենքեր, սրճարան, եկեղեցի, մեքենաներ։
«Անօդաչուներից մեկը հարվածել է բազմահարկ բնակելի շենքի։ Զոհերից հրաշքով հաջողվել է խուսափել։ Շենքի մոտակայքում այրվել են մեքենաներ, շրջակա շենքերի պատուհանները կոտրվել են։ Մեկ այլ անօդաչու թռչող սարք հարվածել է ութերորդ և իններորդ հարկերի միջև գտնվող բնակարանին։ Բարեբախտաբար, այն չի պայթել։ Բնակիչները տարհանվել են»,- ասել է Տերեխովը։
Չուգուևում զոհվել է 3 մարդ, ևս 3-ը վիրավորվել են։ Ուկրաինայի արտակարգ իրավիճակների պետական ծառայության տվյալներով՝ հարվածները հասցվել են հրթիռներով և անօդաչու թռչող սարքերով. վնասվել են ավտոտնակներ, մեքենաներ, բնակելի և այլ շենքեր։
Դնեպրոպետրովսկի մարզում վիրավորվել է 3 մարդ։ Մարզի ռազմական վարչակազմի ղեկավար Ալեքսանդր Գանժան հայտնել է, որ Նիկոպոլի շրջանում վիրավորվել է 2 մարդ, վնասվել են ենթակառուցվածքներ, բազմահարկ և մասնավոր տներ, դեղատուն, սրճարան, օժանդակ շինություն և մեքենաներ։ Պավլոգրադի շրջանում մասնավոր տան վրա հարձակման ժամանակ թեթև վնասվածքներ է ստացել մեկ կին։
Թարգմանությունը՝ Էմմա Չոբանյանի
