09.06.2026 | 00:17
Մարկո Ռուբիոն շնորհավորել է Փաշինյանին
Հենրիխ Մխիթարյանն «Ինտերի» հետ բանակցում է առանց գործակալի
08.06.2026 | 17:31
Հայաստանի ազգային հավաքականի նախկին ավագ Հենրիխ Մխիթարյանն առաջիկայում կերկարաձգի «Ինտերի» հետ պայմանագիրը։ Իտալական ակումբի մարզական տնօրեն Պիերո Աուզիլիոն հայտարարել է, որ 37-ամյա կիսապաշտպանն անձամբ է բանակցում նոր պայմանագրի շուրջ։
«Մխիթարյանն անձամբ է վարում բանակցությունները՝ առանց որևէ գործակալի միջամտության: Նա բոլորովին այլ մակարդակի վրա է»,- Supernova-ի հետ հարցազրույցում ասել է Պիերո Աուզիլիոն, սոցցանցերում հայտնել է ինսայդեր Ֆաբրիցիո Ռոմանոն։
Հենրիխ Մխիթարյանը մեկ տարով է երկարաձգելու գործող պայմանագիրը, որն ավարտվում է հունիսի 30-ին։ Նոր պայմանագրով նրա աշխատավարձն ավելի ցածր կլինի։
Հայաստանի հավաքականի պատմության լավագույն ռմբարկուն 2022 թվականից է խաղում «Ինտերում», որի կազմում 2-ական անգամ դարձել է Իտալիայի չեմպիոն, գավաթակիր, սուպերգավաթակիր ու երկու անգամ խաղացել է Չեմպիոնների լիգայի եզրափակիչում։ Վերջերս նա նվաճել էր կարիերայի 28-րդ տիտղոսը։ Ավարտված մրցաշրջանում հայ կիսապաշտպանը մասնակցել է 39 հանդիպման, դարձել 4 գոլի ու 3 գոլային փոխանցման հեղինակ։ Կարիերայի ընթացքում Հենրիխ Մխիթարյանը հանդես է եկել նաև Երևանի «Փյունիկում» (2006-2009 թթ.), Դոնեցկի «Մետալուրգում» (2009-2010 թթ.) ու «Շախտյորում» (2010-2013 թթ.), Դորտմունդի «Բորուսիայում» (2013-2016 թթ.), անգլիական «Մանչեսթեր Յունայթեդում» (2016-2018 թթ.) ու «Արսենալում» (2018-2019 թթ.), իտալական «Ռոմայում» (2019-2022 թթ.)։
