28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Ստամբուլում վաղը տեղի կունենա Թուրքիայի, Ադրբեջանի և Վրաստանի արտաքին գործերի նախարարների 10-րդ հանդիպումը
Քաղաքականություն
07.06.2026 | 17:33
Թուրքիայի, Ադրբեջանի և Վրաստանի արտաքին գործերի նախարարների 10-րդ հանդիպումը տեղի կունենա վաղը՝ Ստամբուլում։ Այս մասին հաղորդել է Haber Global հեռուստաալիքը՝ հղում անելով Թուրքիայի արտաքին գործերի նախարարության աղբյուրներին։
Հանդիպմանը, որին կմասնակցեն երկրների ԱԳ նախարարներ Հաքան Ֆիդանը, Ջեյհուն Բայրամովը և Մակա Բոճորիշվիլին, կքննարկվեն երեք երկրների միջև առկա համագործակցությունը և առաջիկա ժամանակահատվածում համատեղ գործունեության ոլորտները։ Անդրադարձ կլինի նաև տարածաշրջանային գործընթացներին, Հարավային Կովկասում արտաքին քաղաքականության հարցերին և համագործակցության, տրանսպորտի, տարածաշրջանային տարանցիկ ցանցերի և էներգետիկ անվտանգության ամրապնդմանը, ինչպես նաև առևտրատնտեսական համագործակցության խորացման հարցերի։
Ըստ աղբյուրների՝ հանդիպման ընթացքում կընդգծվի, որ երկրների միջև եռակողմ համագործակցության մեխանիզմը կարևոր և արդյունավետ հարթակ է տարածաշրջանում կայունության և բարգավաճման խթանման համար, և որ Թուրքիայի ամուր և բազմակողմանի կապերն Ադրբեջանի ու Վրաստանի հետ զգալիորեն նպաստում են տարածաշրջանային կայունությանը և տնտեսական ինտեգրմանը։
Ուշադրության կենտրոնում կլինեն Միջին միջանցքում տարածաշրջանային տրանսպորտային նախագծերի, մասնավորապես, Բաքու-Թբիլիսի-Կարս երկաթուղու ամրապնդումը, լոգիստիկ ցանցերի զարգացումը և տրանսպորտային հնարավորությունների ընդլայնումը։
Թարգմանությունը՝ Էմմա Չոբանյանի
