Ռումինիայի Կոնստանցա նավահանգստում ծովային անօդաչու սարք է պայթել

Այսօր առավոտյան Ռումինիայի Կոնստանցա նավահանգստում ռազմածովային անօդաչու սարք է պայթել։ Ռումինիայի պաշտպանության նախարարությունը հաստատել է միջադեպի մասին տեղեկությունը, գրում է Current time-ը։

Գերատեսչության տվյալներով՝ միջադեպը տեղի է ունեցել տեղական ժամանակով 10:30-ի սահմաններում 78-րդ նավամատույցում՝ Ռումինիայի ծովային փրկարարական գործակալության շենքի մոտ։ Արտակարգ իրավիճակների դեպարտամենտի ղեկավար Ռաեդ Արաֆաթը Digi 24-ին ասել է, որ փրկարարական գործակալության ներկայացուցիչները նավահանգստում ծովային անօդաչու սարքի մասին հայտնել են ժամը 6:00-ի սահմաններում, որից հետո համապատասխան մարմինները շրջափակել են տարածքը:

Հաղորդվում է, որ անօդաչու սարքը մխրճվել է նավթային տերմինալից մի քանի հարյուր մետր հեռավորության վրա գտնվող նավթային թափոնների զսպման արգելապատնեշի մեջ։ Հայտնաբերվելուց մի քանի ժամ անց այն պայթել է։ Ռումինիայի պաշտպանության նախարարությունը նշել է, որ այն Ուկրաինայում պատերազմում օգտագործվող անօդաչու թռչող սարքի տեսակ է, նման անօդաչուներ ռումինական բանակի սպառազինության մեջ չկան։

Նախնական տեղեկություններով՝ ոչ ոք չի տուժել։ Արաֆաթը նշել է, որ իշխանություններն ակտիվացրել են «կարմիր» արձագանքման պլանը, բոլոր ծառայությունները բարձր պատրաստվածության վիճակում են։

Մայիսին Հունաստանի Լեֆկադա քաղաքի ափերի մոտ ծովային անօդաչու սարք էր հայտնաբերվել։ Ձկնորսներն այն քարշակել էին Վասիլիկի նավահանգիստ, այնուհետև նավակը տեղափոխել ռազմածովային բազա և հետագայում վնասազերծել։ Ենթադրվում է, որ օպերատորները կորցրել են կառավարումը, և անօդաչու սարքը շեղվել է ուղղությունից։

Հունաստանի ազգային պաշտպանության գլխավոր շտաբի անցկացրած փորձաքննությունը հաստատել էր, որ անօդաչուն պատկանում է Ուկրաինային և օգտագործվել է ռուսական «ստվերային նավատորմի» հետ կապված նավերի դեմ գործողություններում։

Հունիսի սկզբին Աթենքը պաշտոնապես բողոք էր ներկայացրել Կիևին այս միջադեպի կապակցությամբ։

Թարգմանությունը՝ Էմմա Չոբանյանի