ՀԱԿ-ը դատապարտել է Մասիսում և Արթիկում ընդդիմադիրների նկատմամբ բռնության դեպքերը

Հայ ազգային կոնգրեսը հայտարարություն է տարածել՝ դատապարտելով Մասիսում և Արթիկում ընդդիմադիր թեկնածուների ու ակտիվիստների նկատմամբ բռնության դեպքերը՝ դրանք որակելով որպես իշխանությունների կողմից վախի և ճնշումների մթնոլորտ ձևավորելուն ուղղված համակարգված քաղաքականության դրսևորում։

«Մասիսում և Արթիկում ընդդիմադիր թեկնածուների ու ակտիվիստների նկատմամբ գործադրված ֆիզիկական բռնության և հարձակումների վերջին դեպքերը փաստում են, որ գործող իշխանությունները հերթական անգամ ոտնահարում են օրենքներն ու մարդու իրավունքները` անցնելով անթույլատրելիի բոլոր սահմանները։

Խորհրդարանական ընտրություններից ընդամենը 5 օր առաջ տեղի ունեցող այս հարձակումները պատահականություն չեն։ Դրանց սկիզբը դրեց անձամբ Փաշինյանը մայիսի 18-ին՝ Արցախից բռնի տեղահանված քաղաքացի Արթուր Օսիպյանի նկատմամբ բռնություն գործադրելու ուղիղ հրահանգով։ Սա իշխող քաղաքական ուժի և անձամբ Նիկոլ Փաշինյանի կողմից համակարգված և ուղղորդված քաղաքականություն է՝ երկրում վախի, ահաբեկման ու ճնշումների մթնոլորտ ձևավորելու համար։

Չունենալով հանրային աջակցություն և գիտակցելով առաջիկա ընտրություններում իր անխուսափելի պարտությունը, իշխանությունը փորձում է ուժի և բռնության միջոցով լռեցնել ընդդիմախոսներին և կանխորոշել ընտրությունների ելքը։

Ակնհայտ է նաև, որ երբ քարոզարշավն անցնում է ֆիզիկական հաշվեհարդարի սպառնալիքի ներքո, խախտվում է մեր քաղաքացիների ազատ կամարտահայտման իրավունքը։

Մենք խստորեն դատապարտում ենք այս քաղաքական վայրագությունները և պահանջում ենք.
1. Իրավապահ մարմիններից՝ անհապաղ դադարեցնել քրեական հետապնդումը և ազատ արձակել Արթուր Օսիպյանին։
2. Զերծ մնալով քաղաքական կողմնակալությունից, բացահայտել բոլոր կատարողներին ու կազմակերպիչներին և նրանց ենթարկել պատասխանատվության օրենքի ողջ խստությամբ։
3. Միջազգային դիտորդական առաքելություններից և մարդու իրավունքների պաշտպանությամբ զբաղվող կառույցներից՝ համարժեք գնահատական տալ ընտրական գործընթացի տապալմանն ուղղված այս բացահայտ ճնշումներին։

Վստահ ենք, որ մեր ժողովուրդը չի ընկրկի այդ սպառնալիքների առաջ, իսկ կատարված հանցագործություններն անհապաղ չբացահայտելու և մեղավորների նկատմամբ քրեական հետապնդում չիրականացնելու դեպքում, կատարվածի ամբողջ պատասխանատվությունը կընկնի իշխող քաղաքական ուժի և նրա ղեկավար Նիկոլ Փաշինյանի վրա»,- ասվում է հաղորդագրությունում։

Հիշեցնենք, որ վերջին օրերին նախընտրական քարոզարշավի ընթացքում մի շարք միջադեպեր են արձանագրվել Մասիսում և Արթիկում։ Մասիսում «Ուժեղ Հայաստան» դաշինքի ներկայացուցիչները հայտարարել էին իրենց կողմնակիցների նկատմամբ հարձակման մասին, ինչի առնչությամբ նախաձեռնվել է քրեական վարույթ։

Իսկ Արթիկում ծեծկռտուք էր տեղի ունեցել։ «Հայաստան» դաշինքից հայտնում են, որ ՔՊ-ականները ծեծի են ենթարկել Ռոբերտ Քոչարյանի աջակից Հակոբ Հարությունյանին, վնասվել է նրա աչքը։ Քննչական կոմիտեից, Factor TV-ի հարցին ի պատասխան, նշել էին, որ մի խումբ անձանց կողմից առողջությանը թեթև վնաս պատճառելու հատկանիշներով նախաձեռնվել է քրեական վարույթ, բայց որևէ անձ չի ձերբակալվել։