Գերմանիան առաջին անգամ չի ընտրվել ՄԱԿ-ի ԱԽ ոչ մշտական անդամ․ դրա համար Բեռլինը մեղադրում է ՌԴ-ին

Գերմանիան չի ընտրվել ՄԱԿ-ի Անվտանգության խորհրդի 2027-2028 թվականների ոչ մշտական ​​անդամ, հաղորդում է Deutsche Welle-ն, որին վկայակոչում է Meduza-ն։

Հունիսի 3-ին ՄԱԿ-ի Գլխավոր վեհաժողովի նստաշրջանում կայացած քվեարկության արդյունքում Պորտուգալիան (190-ից 134 ձայն) և Ավստրիան (131 ձայն) կլինեն Արևմտյան Եվրոպայի երկու երկրները, որոնք կզբաղեցնեն Անվտանգության խորհրդի ոչ մշտական ​​տեղերը։ Գերմանիան ստացել է 104 ձայն։

ՄԱԿ-ի Անվտանգության խորհուրդը բաղկացած է 15 անդամ երկրից: Դրանցից հինգը՝ Մեծ Բրիտանիան, Չինաստանը, Ռուսաստանը, ԱՄՆ-ն և Ֆրանսիան, մշտական ​​անդամներ են՝ վետոյի իրավունքով: Մյուս տասը ոչ մշտական ​​անդամներ են, որոնք ընտրվում են երկու տարի ժամկետով: Հինգ ոչ մշտական ​​անդամների՝ Հունաստանի, Դանիայի, Պակիստանի, Պանամայի և Սոմալիի ժամկետը լրանում է 2026 թվականի վերջին։

Մեկնաբանելով քվեարկության արդյունքները՝ Գերմանիայի արտաքին գործերի նախարար Յոհան Վադեֆուլը ենթադրություն է հայտնել, որ Բեռլինի աջակցությունն Ուկրաինային և Իսրայելին կարող էր նրան ՄԱԿ-ի Անվտանգության խորհրդում տեղի կորուստ արժենալ։

«Մենք վճռականորեն աջակցում ենք Ուկրաինային, և Ռուսաստանը չի ցանկանում տեսնել նման ձայն Անվտանգության խորհրդում»,- ասել է նախարարը։

Նա հավելել է՝ «գաղտնիք չէ», որ Ռուսաստանն արշավ է ծավալել Գերմանիայի թեկնածության դեմ։ Լրացուցիչ մանրամասներ Վադեֆուլը չի տրամադրել։

Գերմանիան վերջին անգամ ՄԱԿ-ի Անվտանգության խորհրդի ոչ մշտական ​​անդամ եղել է 2019-ից 2020 թվականներին: Politico-ն նշում է, որ վերջին տասնամյակների ընթացքում Գերմանիան այս տեղը զբաղեցրել է յուրաքանչյուր ութ տարին մեկ: DW-ն հաղորդում է, որ Բեռլինն առաջին անգամ է պարտվել Անվտանգության խորհրդի ոչ մշտական ​​անդամի ընտրության քվեարկությանը։

Հունիսի 3-ի քվեարկությունից հետո Ավստրիան և Պորտուգալիան կմիանան Անվտանգության խորհրդին Արևմտյան Եվրոպայի և այլ պետությունների խմբից, Ղրղզստանը՝ Ասիա-խաղաղօվկիանոսյան տարածաշրջանից, Տրինիդադը և Տոբագոն՝ Լատինական Ամերիկայից և Կարիբյան ավազանից, իսկ Զիմբաբվեն՝ Աֆրիկյան պետությունների  խմբից։

Թարգմանությունը՝ Էմմա Չոբանյանի