Արևմուտքին անհրաժեշտ են Հայաստանի հազվագյուտ հանքային ռեսուրսները․ Զախարովան՝ ՀՀ Ռուբիոյի այցի մասին

Արևմուտքն ու ԱՄՆ-ն Հայաստանին մոտենում են «վերցրու և թալանիր» տրամաբանությամբ. նրանց անհրաժեշտ են երկրի հազվագյուտ ռեսուրսները։ Այս մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան Սանկտ Պետերբուրգի միջազգային տնտեսական ֆորումի շրջանակում ՏԱՍՍ-ին տված հարցազրույցում։

««Խլել , թալանել, յուրացնել, նվաստացնել և ոչնչացնել» տրամաբանությունը, ցավոք, դեռևս կա Արևմուտքում, և նրանք այն կիրառում են, այդ թվում՝ Կովկասում»,- պնդել է Զախարովան։

Որպես օրինակ նա նշել է ԱՄՆ պետքարտուղար Մարկո Ռուբիոյի Հայաստան կատարած այցը։

«Նա չի ստորագրել միջազգային պայմանագրեր, որոնք պարտադիր են երկու կողմերի համար, հակառակ դեպքում՝ դա հավասարություն կլիներ։ Ստորագրվել են հռչակագրային փաստաթղթեր, բայց կա հստակ միտում դեպի ռեսուրսատար և հազվագյուտ մետաղների ոլորտներ, որոնցով Միացյալ Նահանգները շատ հետաքրքրված է»,- հայտարարել է նա։

Զախարովայի պնդմամբ՝ «Ռուսաստանն առաջարկել և շարունակում է առաջարկել Հայաստանին փոխշահավետ, փոխադարձ արդյունավետ և փոխադարձ հարգանքի վրա հիմնված շփում  և հարաբերությունների զարգացում բոլոր ոլորտներում՝ էներգետիկա, առևտուր, զբոսաշրջություն»։

«Սա պարզապես թղթի վրա մնացած մտադրության հռչակագիր չէ, սա PR արշավ չէ. նրանք եկան, ստորագրեցին, ձեռք սեղմեցին, ապա բաժանվեցին և մոռացան։ Այն, ինչ մենք ստորագրում ենք, իրականացվել և իրականացվում է։ Եվ այն իրականացվում է մեր երկրների ժողովուրդների շահերից ելնելով»,- ասել է Զախարովան։

Հիշեցնենք, որ ԱՄՆ պետքարտուղար Մարկո Ռուբիոյի՝ մայիսի 26-ին Երևան այցի ընթացքում Հայաստանի և Միացյալ Նահանգների միջև նախաստորագրվել է TRIPP նախագծի շուրջ ռազմավարական համագործակցության շրջանակային համաձայնագիրը, ինչպես նաև մի շարք այլ փաստաթղթեր՝ այդ թվում՝ կարևորագույն հանքանյութերի և հազվագյուտ հանածոների արդյունահանման և մշակման ոլորտում մատակարարման ապահովման շրջանակային հուշագիրը։

Այսօր արդեն ՀՀ ԱԳ նախարար Արարատ Միրզոյանը ստորագրել է TRIPP-ի համաձայնագիրը։

Թարգմանությունը՝ Էմմա Չոբանյանի