ՆԱՏՕ-ի գլխավոր քարտուղար Մարկ Ռյուտեն չհայտարարված այցով Կիևում է

ՆԱՏՕ-ի գլխավոր քարտուղար Մարկ Ռյուտեն ժամանել է Կիև՝ Ուկրաինայի նախագահ Վլադիմիր Զելենսկիի հետ բանակցությունների համար, հայտնել է Ուկրաինայի արտաքին գործերի նախարար Անդրեյ Սիբիհան X սոցցանցում, գրում է BBC-ի ռուսական ծառայությունը։

«Մենք խորապես գնահատում ենք ՆԱՏՕ-ի միասնությունն ու ուժը Ուկրաինային աջակցելու գործում, քանի որ մենք միասին աշխատում ենք տրանսատլանտյան անվտանգությունը պաշտպանելու համար»,- գրել է Սիբիհան։

Ավելի վաղ ուկրաինական «Ուկրզալիզնիցա» երկաթուղային ընկերությունն էր հայտնել Ռյուտեի այցի մասին․ «Այս այցը, ինչպես նախորդ բոլոր այցերը, շատ կարևոր է, քանի որ այն դաշինքի կողմից մեր երկրին համերաշխության և աջակցության ժեստ է: Երկաթե դիվանագիտություն՝ ավանդաբար ըստ ժամանակացույցի»:

ՆԱՏՕ-ի գլխավոր քարտուղարի Կիև այցի մասին ավելի վաղ չէր հայտարարվել:

Ռյուտեն Կիև այցելել էր նաև փետրվարի սկզբին։ Գերագույն ռադայում ունեցած ելույթում նա հայտարարել էր, որ արևմտյան  երկրների զինված ուժերը կարող են տեղակայվել Ուկրաինայում խաղաղության համաձայնագրի կնքումից անմիջապես հետո։

«Եվ երբ խաղաղության համաձայնագիրը կնքվի, անմիջապես կհայտնվեն զինված ուժեր, օդում ինքնաթիռներ և ՆԱՏՕ-ի այն անդամների ռազմածովային աջակցությունը, ովքեր կհամաձայնվեն»,- ասել էր Ռյուտեն՝ հավելելով, որ ՆԱՏՕ-ի մյուս անդամները կօգնեն այլ միջոցներով։

Ռուսաստանը բազմիցս կտրականապես դեմ է արտահայտվել արևմտյան զորքերի տեղակայմանն Ուկրաինայում։ Մոսկվան նաև դեմ է հրադադարին՝ պահանջելով Կիևից տարածքային զիջումներ, որոնք Ուկրաինան հրաժարվում է անել։

Թարգմանությունը՝ Էմմա Չոբանյանի