Արթուր Օսիպյանի մի քանի իրավունք է խախտվել․ Իզաբելլա Սարգսյան. ՏԵՍԱՆՅՈՒԹ

Քաղհասարակության ներկայացուցիչներն այսօր նամակ են փոխանցել ՀՀ գլխավոր դատախազ Աննա Վարդապետյանին՝ Արթուր Օսիպյանին ազատ արձակելու պահանջով։

ԵՀՀ ծրագրի տնօրեն Իզաբելլա Սարգսյանը, որը մասնակցում էր դատախազության դիմաց կազմակերպված ակցիային, նշեց, որ Արթուր Օսիպյանի կալանավորմամբ մի շարք հիմնարար իրավունքների խախտումներ։

«Ինձ թվում է՝ ակնհայտ է, նաև մեր նամակի մեջ դա շատ ակնհայտ գրված է, որ այստեղ առնվազն մի քանի մարդու իրավունքների խախտում կա։ Ե՛վ խոսքի ազատության հետ կապված, և՛ արդար դատաքննության հետ կապված, և՛ վատ վերաբերմունքի հետ կապված։ Այնպես որ, այստեղ երկու կարծիք լինել չի կարող»,– ասել է Սարգսյանը՝ պատասխանելով հարցին, թե արդյոք այս իրավիճակը կարելի է համարել ժողովրդավարական ուղուց շեղում։

Նա նշել է, որ Արթուր Օսիպյանի ազատ արձակման պահանջին միացել են բազմաթիվ հասարակական կազմակերպություններ և հանրային հեղինակություն ունեցող անձինք։

«Այսօր հինգս ենք այստեղ՝ Բորիսը՝ Երևանի մամուլի ակումբից, Անահիտը՝ Մարդու իրավունքների կրթության կենտրոնից, Աննան՝ «Մարդու իրավունքների պաշտպանություն առանց սահմանների» կազմակերպությունից, Օլեգը Ալավերդուց է եկել՝ համայնքային մոբիլիզացիայի կենտրոնից, և ես՝ որպես անհատ։ Բայց իրականում առնվազն 21 շատ հեղինակավոր կազմակերպություններ միացել են այս պահանջին»,– նշել է նա։

Սարգսյանի խոսքով՝ նախաձեռնությանն աջակցողների թվում կան տարբեր ոլորտների ներկայացուցիչներ։ «Եթե նայեք նաև ստորագրողների ցանկը, մեջը կան և՛ մշակութային գործիչներ, և՛ գիտնականներ, և՛ ուսուցիչներ։ Եվ ընդամենը երկու-երեք ժամվա մեջ բավական մեծ արձագանք է ստացել»,– ասել է նա։

Նա նաև հույս է հայտնել, որ հանրային աջակցությունն ավելի կընդլայնվի։ «Մենք հույս ունենք, որ նաև մեդիայի միջոցով հնարավոր կլինի ավելի լայն մոբիլիզացիա ապահովել Արթուրին ազատ արձակելու պահանջով»,– ընդգծել է Սարգսյանը։

Մանրամասները՝ տեսանյութում։