Աննա Վարդապետյանը պետք է անմիջապես հանդիպեր․ մեծ պահանջ կա Օսիպյանին ազատ արձակելու համար․Դուլգարյան. ՏԵՍԱՆՅՈՒԹ

Քաղաքացիական ակտիվիստ Օլեգ Դուլգարյանը անդրադարձել է Արթուր Օսիպյանի կալանավորմանը և նշել, որ նա պետք է անհապաղ ազատ արձակվի։

«Ես կարծում եմ, ինչպես նաև գործընկերներս նշեցին, սա իսկապես քննություն է։ Երբ նամակը հանձնվում էր, մենք նաև պահանջեցինք դատախազի հետ հանդիպում, և նշեցին, որ դա պետք է ընթացակարգով տեղի ունենա։ Այնինչ իմ կարծիքով նման պահանջի դեպքում կարող են անմիջապես նաև հանդիպումները տեղի ունենալ՝ առանց գրավոր ընթացակարգերի»,– ասել է Դուլգարյանը։

Նրա խոսքով՝ ձևավորված է լայն հասարակական պահանջ։ «Եթե մենք խոսում ենք մոտ 20 կազմակերպությունների, շուրջ 100 քաղաքացիների և տարբեր վայրերում իրականացվող ակցիաների մասին, կարող ենք ասել, որ համընդհանուր պահանջ է ձևավորվել»,– նշել է նա։

Դուլգարյանը կարծիք է հայտնել, որ դատախազությունը կարող է արագ արձագանքել ստեղծված իրավիճակին։ «Ես ոչ թե ուզում եմ հավատալ, այլ վստահ եմ, որ գլխավոր դատախազը կարող է ընդառաջ գնալ հասարակության պահանջներին, որովհետև հասարակությունը վստահ է և պնդում է, որ որևէ հիմքեր չկան Արթուր Օսիպյանին այսքան երկար պահելու համար»,– ասել է նա՝ հավելելով, որ հատկապես մտահոգիչ է կալանավորի առողջական վիճակը։

«Հատկապես այս իրավիճակում, երբ Արթուր Օսիպյանը գտնվում է հացադուլի մեջ և նրա կյանքին վտանգ է սպառնում»,– ընդգծել է Դուլգարյանը։
Անդրադառնալով գլխավոր դատախազի քաղաքական կենսագրությանը՝ նա նշել է, որ դա կանխատեսումներ անելու հիմք չի տալիս։ «Ես չեմ կարող այս պահին պնդել, որ դա ունենալու է ազդեցություն կամ չի ունենալու, բայց վստահ եմ, որ տիկին դատախազը ունի բոլոր հիմքերը, որպեսզի ընդառաջ գնա և ապացուցի, որ կարող է երկխոսել հասարակության հետ»,– ասել է նա։

Դուլգարյանի խոսքով՝ գործի շուրջ քննարկումները պետք է դիտարկել նաև ավելի լայն համատեքստում։

«Արթուր Օսիպյանը քաղաքացիական ակտիվիստ է եղել, պայքարել է կոռուպցիայի դեմ, տարբեր բարքերի դեմ, և իր աջակցությունն է հայտնել տարբեր ռեֆորմներին։ Այս քաղաքացին պետք է իր պայքարի արդյունքում տեսնի արդար վերաբերմունք»,– նշել է նա։

Նա նաև ընդգծել է, որ գործընթացը տեղի է ունենում նախընտրական շրջանում, ինչը մեծացնում է հանրային զգայունությունը։ «Եթե հասարակության ձայնը նախընտրական շրջանում լսելի չի լինի, ապա հետո շատ մշուշոտ է մնում պատկերացումը, թե ընտրություններից հետո ինչպես են լսելու»,– եզրափակել է Դուլգարյանը։

Մանրամասները՝ տեսանյութում։