Արարատ Միրզոյանը Մարթա Կոսի հետ քննարկել է ՀՀ-ԵՄ ապրանքաշրջանառության ավելացման մեխանիզմները

ՀՀ ԱԳ նախարար Արարատ Միրզոյանը հեռախոսազրույց է ունեցել ԵՄ ընդլայնման հարցերով հանձնակատար Մարթա Կոսի հետ։ Կողմերը քննարկել են ՀՀ-ԵՄ գործընկերության զարգացման ընթացքը, տնտեսական համագործակցության խորացման և ապրանքաշրջանառության ավելացման հնարավորությունները, ինչպես նաև տարածաշրջանային փոխկապակցվածության և ժողովրդավարական դիմակայունության ամրապնդմանն ուղղված ծրագրերը։ Այս մասին տեղեկացնում են ՀՀ ԱԳՆ-ից:

«Արարատ Միրզոյանը և Մարթա Կոսը գոհունակությամբ նշել են ՀՀ-ԵՄ գործընկերության զարգացման դինամիկան։

Արարատ Միրզոյանն ու Մարթա Կոսը քննարկել են ՀՀ-ԵՄ գործընկերության տնտեսական բաղադրիչի խթանմանը, այդ թվում՝ ապրանքաշրջանառության ավելացմանն ուղղված մեխանիզմների շրջանակը:

Անդրադարձ է կատարվել տարածաշրջանային փոխկապակցվածության զարգացմանն ուղղված ծրագրերին, ինչպես նաև ժողովրդավարական դիմակայունության շարունակական ամրապնդմանն ուղղված փոխգործակցությանը՝ որպես ՀՀ-ԵՄ ռազմավարական օրակարգի մաս»,- ասվում է հաղորդագրությունում:

Հիշեցնենք, որ ռուսական կողմը վերջին շրջանում պարբերաբար սահմանափակումներ ու ստուգումներ է կիրառում հայկական արտադրանքի նկատմամբ՝ պատճառաբանելով ծագման, որակի կամ ֆիտոսանիտարական պահանջների հետ կապված հարցերը։ Մայիսի 30-ից, օրինակ, Ռոսսելխոզնադզորը ժամանակավոր սահմանափակումներ է մտցրել Հայաստանից առաքվող մի շարք թարմ բանջարեղենի և ելակի ներմուծման վրա։ Փաշինյանն ավելի վաղ հայտարարել էր, որ արտահանման խնդիրների լուծումը պետք է լինի ոչ թե սուվերենության հաշվին, այլ ապրանքների որակն ու ստանդարտներին համապատասխանությունը բարձրացնելու միջոցով, որպեսզի դրանք կարողանան արտահանվել տարբեր ուղղություններով՝ «հյուսիս, հարավ, արևելք, թե արևմուտք»։