Բաքու-Թբիլիսի-Կարս երկաթուղին պաշտոնապես բացվել է․ արարողությանը մասնակցել է նաև Դավիթ Խուդաթյանը

Արդիականացումից հետո այսօր պաշտոնապես բացվել է Բաքու-Թբիլիսի-Կարս նոր երկաթուղային գիծը։ Այս մասին հայտնում են վրացական ու ադրբեջանական լրատվամիջոցները։ Բացման պաշտոնական արարողությունը տեղի է ունեցել  Ախալքալաքի կայարանում։

Գծի շահագործման հանձնումը խորհրդանշող կոճակը սեղմել են Վրաստանի վարչապետ Իրակլի Կոբախիձեն, էկոնոմիկայի և կայուն զարգացման նախարար Մարիամ Կվրիվիշվիլին, Ադրբեջանի թվային զարգացման և տրանսպորտի նախարար Ռաշադ Նաբիևն ու Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն։

Ադրբեջանական կողմից արարողությանը մասնակցել է նաև «Ադրբեջանի երկաթուղիներ» ՓԲԸ-ի նախագահ Ռովշան Ռուստամովը:

Վրացական կողմի հաղորդմամբ՝ միջոցառմանը ներկա են Վրաստանի կառավարության անդամներ, խորհրդարանականներ, դիվանագիտական ​​կորպուսի և գործընկեր երկրների ներկայացուցիչներ, այդ թվում՝  Հայաստանի տարածքային կառավարման և ենթակառուցվածքների նախարար Դավիթ Խուդաթյանը, ինչպես նաև հյուրեր Ուզբեկստանից և Ղազախստանից։

Վրաստանի Էկոնոմիկայի և կայուն զարգացման նախարարության տվյալներով՝ նոր երկաթուղային գիծը Վրաստանի, Ադրբեջանի և Թուրքիայի համատեղ ռազմավարական նախագիծն է, որը կարևոր դեր է խաղում Եվրոպայի և Ասիայի միջև տրանսպորտային կապի ամրապնդման գործում։

Նոր երկաթուղին ստեղծում է լրացուցիչ հզորություն տարածաշրջանում, զգալիորեն նպաստում է բեռնափոխադրման ուղիների դիվերսիֆիկացիային և բարելավում է տարածաշրջանային կապը։ Նշվում է, որ Բաքու-Թբիլիսի-Կարս գծի բեռնափոխադրումների ծավալը տարեցտարի աճում է: Լիարժեք շահագործման հանձնվելուց հետո գծի թողունակությունը կաճի մինչև տարեկան 5 միլիոն տոննա, ինչը թույլ կտա տարածաշրջանին սպասարկել լրացուցիչ բեռնափոխադրումներ և զգալիորեն կամրապնդի տրանսպորտային ներուժը։

Հավելենք, որ Բաքու-Թբիլիսի-Կարս երկաթուղին բեռնափոխադրումների համար փորձնական շահագործման է հանձնվել 2017 թվականի հոկտեմբերի 30-ին։ Երթուղու արդիականացումը նպատակ ունի մեծացնել դրա թողունակությունը և զարգացնել միջազգային բեռնափոխադրումները Ասիայի ու Եվրոպայի միջև։