22.06.2026 | 20:16
Հունիսի 23-ի գիշերը Քանաքեռ-Զեյթունում ծառերի սրսկման աշխատանքներ կիրականացվեն. պատուհանները փակ պահել
Վոլոդինը հայտարարել է, թե «Փաշինյանը Հայաստանը ԵՄ-ին միացնելու անձնական պարտավորություն է ստանձնել՝ դա անելով ՌԴ-ի ու ԵՏՄ-ի հաշվին»
Քաղաքականություն
02.06.2026 | 15:19
ՌԴ-ից շարունակում են տարբեր մեկնաբանություններն ու սպառնալիքները Հայաստանի հասցեին։ Հերթական հայտարարությամբ հանդես է եկել Պետդումայի նախագահ Վյաչեսլավ Վոլոդինը։
«Բորբոսը մեռնում է լույսի տակ։ Հայաստանի վարչապետ Փաշինյանի հայտարարությունն այն մասին, որ ինքը «կվճարի յուրաքանչյուր փչացած պղպեղի» համար, որը սահմանափակումների պատճառով չի մատակարարվի Ռուսաստան, հստակ ցույց է տալիս դա»,- գրել է նա MAX ալիքում։
Ըստ Վոլոդինի՝ Հայաստանի վարչապետ Նիկոլ Փաշինյանն «օգտագործում է Եվրասիական տնտեսական միությունը՝ Եվրամիությանը միանալու համար՝ փորձելով լուծել իր բոլոր խնդիրները ԵՏՄ-ի, առաջին հերթին՝ Ռուսաստանի հաշվին»։ Նա հայտարարել է, թե Հայաստանի ղեկավարությունը, իբր, բաց չի ասում հանրությանը ԵՄ-ին անդամակցելու մասին՝ երկրի քաղաքացիներից թաքցնելով, թե ինչ կլինի ԵՏՄ-ից դուրս գալու դեպքում, մասնավորապես, «գազի գները գրեթե չորս անգամ կբարձրանան բնակիչների համար, կտրուկ կնվազեն Ռուսաստանից Հայաստան կատարվող միջսահմանային փոխանցումները, որոնք ներկայում տարեկան կազմում են գրեթե 4 միլիարդ դոլար (բոլոր փոխանցումների երկու երրորդը), Ռուսաստան մուտք գործելու միգրացիոն արտոնությունները կչեղարկվեն, կդադարեցվեն Հայաստանից Ռուսաստան ծաղիկների, հատապտուղների, մրգերի, բանջարեղենի (ներառյալ՝ պղպեղի), ձկան, ալկոհոլի և հանքային ջրի մատակարարումները»։
«Նույն բանը տեղի ունեցավ նաև Ուկրաինայում։ ԵՄ-ի հետ ինտեգրման վերաբերյալ որոշում կայացնելիս նրանք խոսում էին մեկ բանի մասին, այդ թվում՝ զարգացման հեռանկարների։ Իրականում պարզվեց, որ ուկրաինական գյուղատնտեսական արտադրանքը, ըստ էության, չթողեցին եվրոպական շուկաներ մուտք գործել՝ սահմանելով խիստ և անբարենպաստ մաքսատուրքերի քվոտաներ։ Նույնը սպասում է նաև Հայաստանին»,- ասել է Վոլոդինը։
Նա ասել է, թե «Փաշինյանը, հավանաբար, Հայաստանը ԵՄ-ին միացնելու անձնական պարտավորություն է ստանձնել և կատարում է այն՝ միաժամանակ փորձելով անդամակցության բոլոր ծախսերը դնել ԵՏՄ-ի և Ռուսաստանի վրա»։
«Ակնհայտ է, որ նրան չի հետաքրքրում հայ ժողովրդի ճակատագիրը և Հայաստանի պետականությունը։ Այս դեպքում նա կարծում է, որ այսպես կարող է պահպանել իր անձնական իշխանությունը։ Գինը ծանր կլինի»,- հայտարարել է նա։
Թարգմանությունը՝ Էմմա Չոբանյանի
