02.06.2026 | 15:05
Եթե որևէ ուժ ունենա բացարձակ իշխանություն, ձեզ ճղելու են, ձեր քթերից բերելու են, հարգելի՛ ժողովուրդ. Փաշոյան․ ՏԵՍԱՆՅՈՒԹ
ԱՄՆ-ը բանակցություններ է վարում ևս մի քանի եվրոպական երկրներում միջուկային զենքի տեղակայման շուրջ․ FT
Քաղաքականություն
02.06.2026 | 14:07
ԱՄՆ-ը դիտարկում է միջուկային զենք տեղակայելու հնարավորությունը ՆԱՏՕ-ի անդամ ևս մի քանի եվրոպական երկրներում՝ դաշնակիցներին վստահեցնելու համար, որ սովորական ռազմական աջակցության կրճատումը չի թուլացնում Վաշինգտոնի անվտանգության երաշխիքները, հաղորդում է Financial Times-ը՝ հղում անելով բանակցություններին ծանոթ երեք աղբյուրների, գրում է Current time-ը։
Լրատվամիջոցի տվյալներով՝ ամերիկացի պաշտոնյաները հասկացրել են, որ պատրաստ են միջուկային զենք տեղակայել վեց երկրներից (Գերմանիա, Բելգիա, Թուրքիա, Իտալիա, Նիդերլանդներ և Միացյալ Թագավորություն) դուրս, որոնք արդեն իսկ ունեն նման զենք իրենց ավիաբազաներում։
Ուկրաինա լիամասշտաբ ներխուժումը և նախագահ Վլադիմիր Պուտինի կողմից Ռուսաստանի միջուկային կարողությունների մասին բազմիցս արված հայտարարությունները, ըստ տեղեկությունների, խթանել են ՆԱՏՕ-ում ԱՄՆ-ի որոշ դաշնակիցների հետաքրքրությունն իրենց տարածքում միջուկային ռումբ կրելու ունակ կրկնակի կարողություններով ինքնաթիռներ (DCA) տեղակայելու հարցում։
Financial Times-ի աղբյուրներից մեկը հայտնել է, որ քննարկումները շարունակվում են ՆԱՏՕ-ի խողովակներով, ամենամեծ հետաքրքրությունը հայտնել են Ռուսաստանի սահմանների մոտ գտնվող դաշնակիցները, այդ թվում՝ Լեհաստանը և Բալթյան երկրները: Մասնավորապես, Լեհաստանի նախկին նախագահ Անջեյ Դուդան կոչ է արել ԱՄՆ-ին ընդլայնել DCA նախաձեռնությունն իր տարածքում, իսկ 2026 թվականին Վարշավան միացել է ֆրանսիական նոր միջուկային նախաձեռնությանը։
ՆԱՏՕ-ի միջուկային համատեղ օգտագործման ծրագիրը նախատեսում է, որ դաշնակիցներն իրավունք ունեն տեղակայել ամերիկյան միջուկային ռումբեր: Սակայն Վաշինգտոնը պահպանում է դրանք օգտագործելու բացառիկ իրավունքը։
Բանակցությունները, որոնք խիստ գաղտնի են և կարող են որևէ փոփոխության չհանգեցնել, տեղի են ունենում Եվրոպայում լայնորեն տարածված մտահոգության ֆոնին՝ կապված նախագահ Դոնալդ Թրամփի կողմից մայրցամաքից ամերիկյան զորքերը և կարևորագույն զենքի համակարգերը դուրս բերելու գործողությունների հետ։
Ավելի վաղ Ֆրանսիայի միջուկային նախաձեռնությանը միացել էին նաև Լիտվան, Նիդերլանդները, Բելգիան, Դանիան, Գերմանիան և Նորվեգիան։ Ֆրանսիայի նախագահ Էմանուել Մակրոնը չի բացառել որոշակի հանգամանքներում ֆրանսիական միջուկային զենքն այլ երկրներում տեղակայելու հնարավորությունը, միաժամանակ ընդգծելով, որ միայն Ֆրանսիայի նախագահը կարող է հրաման տալ դրանք օգտագործելու համար։
Պաշտոնական տվյալներով՝ Ֆրանսիան ներկայում ունի 300-ից մի փոքր պակաս միջուկային մարտագլխիկ։
Թարգմանությունը՝ Էմմա Չոբանյանի
