Քաղաքականություն
01.06.2026 | 16:00
Թուրքիա-Հայաստան հարաբերությունների կարգավորման և Ալիջանի սահմանային անցակետի մոտ ապագայում նախատեսված բացմանը զուգընթաց՝ Իգդիրից դեպի Հայաստան զբոսաշրջային ուղևորությունների թիվը սկսել է աճել, գրում են տեղական լրատվամիջոցները։
Նշվում է, որ Վրաստանի տարածքով Հայաստան ճանապարհորդող իգդիրցիներն այցելում են մայրաքաղաք Երևան և շրջակա քաղաքներ՝ լուսանկարներ անելով։
«Իգդիրի կենտրոնից մոտ 30 կիլոմետր հեռավորության վրա է մայրաքաղաքը։ Քաղաքը շատ գեղեցիկ է, մաքուր, ընդարձակ և լավ պահպանված։ Մենք ամենուրեք բոլորին ասում ենք, որ Թուրքիայից ենք։ Արձագանքները խառն են. նրանք դեռ լիովին պատրաստ չեն դրան։ Այնուամենայնիվ, եթե սահմանային անցակետը բացվի, մարդիկ արագ կհարմարվեն միմյանց»,- ասել է Հայաստան այցելած թուրք գործարար Էրջան Ալագյոզը։
«Մաքուր բնության հարթակի» խոսնակ, գրող-հետազոտող Սերդար Գյունդողդուն էլ, որը նույնպես մասնակցել է ուղևորությանը, նշել է․ «Սա իմ երկրորդ այցն է Հայաստան: Ճիշտ չի լինի համեմատել Իգդիրը Հայաստանի մայրաքաղաք Երևանի հետ քաղաքաշինության առումով: Մեկը մայրաքաղաք է, մյուսը՝ Արևելյան Անատոլիայի նահանգ: Սակայն մաքրության և պահպանման առումով Հայաստանի մյուս քաղաքները նույնպես ավելի լավն են, մաքուր, քան Իգդիրը: Տպավորություն է, որ շրջափակումը մեզ մոտ է, ոչ թե Հայաստանում»:
«Երբ մենք վերադառնում ենք Իգդիր Հայաստանից ու Նախիջևանից, որոնք իրար մոտ են, հավատացեք, մենք ամաչում ենք»,-հայտարարել է նա։
Թարգմանությունը՝ Էմմա Չոբանյանի
