Նեթանյահուն հրամայել է հարձակումներ իրականացնել Բեյրութի հարավային արվարձանների վրա

Իսրայելի վարչապետ Բենիամին Նեթանյահուն հրամայել է հարձակումներ իրականացնել Լիբանանի մայրաքաղաք Բեյրութում «Հըզբոլլահ»-ի կողմից վերահսկվող հարավային արվարձանների վրա՝ ազդարարելով պատերազմի հետագա սրման մասին, որը բարդացնում է ԱՄՆ-Իրան հակամարտության լուծումը, գրում է Reuters-ը։

Իրանի ԱԳՆ խոսնակ Էսմայիլ Բաղային հայտարարել է, որ Լիբանանում Իսրայելի հարձակումներն ԱՄՆ-Իրան պատերազմի ավարտի դիվանագիտական ​​գործընթացի հետաձգման պատճառներից մեկն են՝ վերահաստատելով, որ Լիբանանում հրադադարը ցանկացած համաձայնագրի անբաժանելի մասն է։

Նեթանյահուն և երկրի պաշտպանության նախարար Իսրայել Կացը հրամայել են իսրայելական զորքերին հարձակվել Բեյրութի հարավային արվարձանում Դահիյե անունով հայտնի «ահաբեկչական թիրախների» վրա՝ «Հըզբոլլահ»-ի կողմից հրադադարի «կրկնակի խախտումներից» և «մեր քաղաքների ու քաղաքացիների դեմ հարձակումներից» հետո, ասվում է Նեթանյահուի գրասենյակի հայտարարության մեջ։

Այս հրամանը հաջորդում է հանգստյան օրերին Լիբանանի հարավում ռազմական գործողությունների սրմանը, երբ իսրայելական զորքերը գրավել են 900-ամյա Բոֆորտ ամրոցը, իսկ Նեթանյահուն հրամայել է զինվորներին ընդլայնել ցամաքային գործողությունները։

Լիբանանի իշխանությունները հայտնում են, որ մարտի 2-ից ի վեր, երբ «Հըզբոլլահ»-ը կրակ բացեց Իսրայելի ուղղությամբ՝ ի պաշտպանություն Իրանի, ինչին իսրայելական կողմը պատասխանեց լայնածավալ գործողություններով, երկրում սպանվել է ավելի քան 3400 մարդ։ Իսրայելը պնդում է, որ նույն ժամանակահատվածում զոհվել է իր 24 զինվոր և չորս քաղաքացիական անձ։

Իսրայելը հարավային Լիբանանում ստեղծել է ինքնահռչակ անվտանգության գոտի, որտեղ ավերել է գյուղեր՝ հայտարարելով, թե նպատակ ունի պաշտպանել հյուսիսային Իսրայելը «Հըզբոլլահ»-ի զինյալներից, որոնք տեղակայված են քաղաքացիական տարածքներում։

Լիբանանում բռնության սրացումը վկայակոչելով՝ Ֆրանսիան կոչ է արել ՄԱԿ-ի Անվտանգության խորհրդի արտակարգ նիստ գումարել։

ԱՄՆ-ն ռազմական գործողությունների սկսվելուց ի վեր Իսրայելի և Լիբանանի կառավարությունների ներկայացուցիչների միջև մի շարք հանդիպումներ է անցկացրել, որոնց մասնակցել է Բեյրութը՝ չնայած «Հըզբոլլահ»-ի խիստ առարկություններին։
Բեյրութի և Վաշինգտոնի միջև դիվանագիտությանը ծանոթ լիբանանյան աղբյուրը նշել է, որ Նեթանյահուի այսօրվա հայտարարությունն արտացոլում է վերջին օրերին ԱՄՆ-ի գլխավորած դիվանագիտական ​​ուղու վատթարացումը։

ԱՄՆ պաշտոնյան կիրակի օրը հայտարարել է, որ պետքարտուղար Մարկո Ռուբիոն Իսրայելի և Լիբանանի միջև ​​բանակցությունների վերաբերյալ խոսել է Լիբանանի նախագահ Ջոզեֆ Աունի և Իսրայելի վարչապետ Բենիամին Նեթանյահուի հետ, և որ նա առաջարկել է «աստիճանական ապաէսկալացիայի» ծրագիր։

«Սա կստեղծի տարածք աստիճանական ապաէսկալացիայի և ռազմական գործողությունների արդյունավետ դադարեցման համար»,- նշել է  պաշտոնյայի։

Թարգմանությունը՝ Էմմա Չոբանյանի