«Ռոսսելխոզնադզոր»-ը հայտարարել է, որ Հայաստանը պետք է կասեցնի ՌԴ արտահանվող ձկան հավաստագրումը

«Ռոսսելխոզնադզոր»-ը հայտարարել է, որ Հայաստանը պետք է դադարեցնի Ռուսաստան արտահանման համար նախատեսված կենդանի ձկան և ձկնամթերքի հավաստագրումը հունիսի 2-ից սկսած, գրում է Ինտերֆաքսը։

«Ստուգման արդյունքների հիման վրա 2026 թվականի հունիսի 2-ից հայկական կողմը պետք է դադարեցնի բոլոր հայկական ընկերությունների կենդանի ձկան և ձկնամթերքի՝ ռուս ստացողների համար անասնաբուժական հավաստագրումը, բացառությամբ երկուսի, որոնք անցել են ստուգումը, մինչև ստեղծված իրավիճակի կարգավորումը»,- ասվում է հայտարարության մեջ։

Այս հայտարարությունը տարածվել է ռուսական գործակալության մասնագետների կողմից Հայաստանի ձկան վերամշակման գործարաններում և իշխանի ֆերմաներում անցկացված ստուգումից հետո։ Նշվում է, թե ստուգման արդյունքները, իբր, անբավարար են եղել։ Բացի այդ, ընկերությունների կեսը հրաժարվել է ստուգում անցնել, նշում է ծառայությունը։

«Երկու գործարաններից ձկան արտադրանքը կներմուծվի Ռուսաստան՝ անվտանգության ցուցանիշների լաբորատոր մոնիթորինգի ենթարկվելու պայմանով»,- պարզաբանվում է հայտարարության մեջ։

«Ռոսսելխոզնադզոր»-ի ղեկավար Սերգեյ Դանկվերտն ավելի վաղ հայտնել էր, որ ծառայությունը հայտնաբերել է արտադրանքի բեռնափոխադրումներ, որոնցից մի քանիսը կարող են հայկական ծագում չունենալ։

«Հայկական լեռնային գետերի կարմրախայտը (իշխանը) ոչ մի կերպ չի կարող նմանվել նորվեգականին»,- հայտարարել էր նա։

Հիշեցնենք, որ մայիսի 30-ից ՌԴ-ն սահմանափակել է նաև Հայաստանից մի շարք մրգերի և բանջարեղենի ներմուծումը։

Թարգմանությունը՝ Էմմա Չոբանյանի