23.07.2026 | 09:45
ՀՀ տարածքում ավտոճանապարհներն անցանելի են
Երևանում կկայանա «Rise» ռազմարդյունաբերական ցուցահանդեսը. կներկայացվեն նախկինում երբևէ չցուցադրված նմուշներ
29.05.2026 | 23:37
Հունիսի 3-ին և 4-ին Երևանում կանցկացվի հայկական ռազմարդյունաբերությանն ու նորարարական տեխնոլոգիաներին նվիրված մեծ ցուցահանդես։ Այս մասին հայտարարել է ԲՏԱ նախարար Մխիթար Հայրապետյանը՝ հրավիրելով հանրությանը ծանոթանալու ոլորտի վերջին նվաճումներին։
«Հունիսի 3-ին և 4-ին Կարեն Դեմիրճյանի անվան մարզահամերգային համալիրում անցկացվելու է «Rise» խորագրով ցուցահանդեսը: Այս միջոցառման ընթացքում ներկայացվելու են տասնյակ հայկական առաջատար ռազմարդյունաբերական ընկերությունների, գիտահետազոտական կենտրոնների և ինժեներական թիմերի տեխնոլոգիական արտադրանքները, լուծումները և գիտական նվաճումները»,- նշել է նա։
Ցուցահանդեսի այցելուները բացառիկ հնարավորություն կունենան տեսնելու ոչ միայն այն զինատեսակներն ու տեխնոլոգիաները, որոնք արդեն իսկ կիրառվում են զինված ուժերում, այլև գաղտնազերծված նոր նախագծեր։
«Այս միջոցառման շրջանակում մենք նախատեսում ենք ներկայացնել ոչ միայն Հայաստանի Հանրապետության բանակին մատակարարված հայրենական արտադրանքները, այլև դեռևս մշակումների և փորձարկումների փուլերում գտնվող տարատեսակ նմուշներ, որոնք նախկինում երբևէ չեն ցուցադրվել»,- ընդգծել է Հայրապետյանը։
Նախարարի խոսքով՝ «Rise»-ը նպատակ ունի դառնալ կարևոր հանգույց ոլորտի զարգացման ու համագործակցության համար.
«Այս միջոցառումը դառնալու է մի նոր, յուրահատուկ միջազգային հարթակ, որը գալիս է նպաստելու ռազմարդյունաբերական ոլորտի տեխնոլոգիական շարունակական զարգացմանը՝ օգնելով նոր հարաբերություններ և համագործակցություններ ձևավորել թե՛ տեղական ռազմարդյունաբերական ընկերությունների միջև, և թե՛ միջազգային գործընկերների հետ»։
