06.10.2026 | 10:42
Հրանտ-Լեոն Ռանոսն առաջին գոլն է խփել Իսպանիայի Սեգունդայում. ՏԵՍԱՆՅՈՒԹ
Ինչու ընդդիմադիր պատգամավորները ներկա չէին զինվորական շքերթին
Քաղաքականություն
28.05.2026 | 18:28
Ազգային ժողովի խորհրդարանական ընդդիմադիր խմբակցությունները չեն մասնակցել Հանրապետության օրվա առթիվ կազմակերպված զորահանդեսին։ Factor.am-ը ընդդիմադիր «Հայաստան» խմբակցության ղեկավար, պաշտպանության նախկին նախարար Սեյրան Օհանյանից հետաքրքրվեց, թե ինչու ինքը կամ խմբակցության այլ պատգամավորներ չեն մասնակցել զինվորական շքերթին։
«Չեմ մասնակցել, որովհետև հրավեր չի եղել»,- ասաց նա։
ԱԺ-ից հետաքրքրվեցինք՝ ինչո՞ւ ընդդիմադիր խմբակցությանը հրավեր չի ուղարկվել։ ԱԺ նախագահի մամուլի խոսնակ Մովսես Հարությունյանը Factor.am-ին փոխանցեց. «Բոլոր պատգամավորներին մասնակցության վերաբերյալ գրություն է ուղարկվել, սակայն ընդդիմադիր պատգամավորներն անպատասխան են թողել՝ այդպիսով մերժելով հրավերը»։
«Պատիվ ունեմ» խմբակցության ղեկավար Հայկ Մամիջանյանն էլ իր չմասնակցելը հետևյալ կերպ մեկնաբանեց․ «Իմ համար անընդունելի է ՀՀ զինված ուժերին նախընտրական շոուի մաս դարձնելը։ Ես նույնպես շոուի մաս դառնալու ցանկություն չունեի»։
Հարցին՝ եթե Հանրապետության օրը մայիսի 28-ին է, և այն այս տարի համընկել է նախընտրական քարոզարշավի հետ, ի՞նչ էր պետք անել, Մամիջանյանը նշեց. «Այս ընթացքում բազմաթիվ առիթներ կային, որոնց ժամանակ կարելի էր անել զինվորական շքերթը, բայց չէր արվում։ Ես շքերթի գաղափարին դեմ չեմ, ասում եմ, որ սա օգտագործվեց որպես շոու»։
Նարեկ Կիրակոսյան
