Տնտեսության համար որևէ սպառնալիք չեմ տեսնում, անծայրածիր հնարավորություններ են բացվում․ Փաշինյան․ ՏԵՍԱՆՅՈՒԹ

«Մենք ասում ենք, որ Եվրասիական տնտեսական միությունից ոչ միայն չենք պատրաստվում դուրս գալ, այլև պատրաստվում ենք մեր լծակները և մեր ներգրավվածությունն օգտագործել մեր երկրի տնտեսական շահերը պաշտպանելու համար»,-այս մասին լրագրողների հետ զրույցում նշեց վարչապետ Նիկոլ Փաշինյանը։

Խոսելով արտահանմանը և ներմուծմանը, այս դեպքում, ըստ վարչապետի, իրենք դիվերսիֆիկացման են գնում, և դա նոր չի սկսվել։

«Տարբեր ուղղություններով եթե Դուք տեսնեք, մեր վիճակագրությանը հետևեք, կտեսնեք, որ մեր արտահանումները տարբեր ուղղություններով ընդհուպ կրկնապատկվել են։ Եվ նաև ես շատ ուրախ եմ, որ Ախալքալաք-Կարս երկաթուղին է բացվել Հայաստանի արտահանումների համար, և նաև առաջիկայում բիզնես պատվիրակություններ են գնալու՝ հանդիպելու, այդ երկաթգծի երկայնքով հնարավոր շուկաներն ուսումնասիրելու․ մենք արդեն միջազգային գործընկերներից ունենք այդ հրավերները։ Բացի այդ, մենք, ընդ որում, Եվրասիական տնտեսական միության պոտենցիալն ամբողջությամբ օգտագործած չենք, որովհետև եթե Դուք տեսնեք Հայաստանի և Ղազախստանի առևտրաշրջանառությունը, սա շատ սահմանափակ է։ Եվ ի վերջո, երկաթուղու բացմամբ Ադրբեջանի միջով Հայաստանի և Ղազախստանի, Հայաստանի և Ղրղզստանի առևտրատնտեսական հարաբերությունները զարգացնելու մեծ պոտենցիալ է ձևավորվել»,-ասաց նա։

Փաշինյանն ընդգծեց՝ Հայաստանի զարգացող տնտեսությանը նա որևէ սպառնալիք չի տեսնում․ «Ընդհակառակը, հիմա Հայաստանի տնտեսության համար բացվում են անծայրածիր հնարավորություններ»։

Մանրամասները՝ տեսանյութում։