Քաղաքականություն
27.05.2026 | 12:59
ԱՄՆ նախագահ Դոնալդ Թրամփի նախաձեռնությամբ Գազայի հատվածի վերականգնման համար ստեղծված Խաղաղության խորհրդի հիմնադրամը մինչև հիմա դատարկ է։ Իրավիճակին ծանոթ չորս աղբյուրներ Financial Times-ին հայտնել են, որ չորս ամիս շարունակ ոչ մի նվիրատվություն չի ստացվել դոնորներից, գրում է The Insider-ը։
Հիմնադրամը ստեղծվել է Համաշխարհային բանկի կողմից հունվարին, այն բանից հետո, երբ Թրամփը հայտարարել էր Խաղաղության խորհրդի ստեղծման մասին և համաշխարհային առաջնորդներին հրավիրել միանալ կազմակերպությանը: ԱՄՆ նախագահի խոսքով՝ խորհրդի մշտական անդամ դառնալ ցանկացող երկրները պետք է ներդրեն առնվազն 1 միլիարդ դոլար:
Նշենք, որ Հայաստանը ևս Խաղաղության խորհրդի անդամ է։
Աղբյուրների համաձայն՝ ԱՄՆ-ն ու խորհրդի մյուս անդամ պետությունները Գազայի վերականգնման համար, ընդհանուր առմամբ, 17 միլիարդ դոլար են հատկացրել, սակայն Համաշխարհային բանկի կողմից կառավարվող հաշիվներին ոչ մի դոլար չի մուտքագրվել: ՄԱԿ-ի կողմից հաստատված Համաշխարհային բանկի մեխանիզմն օգտագործելու փոխարեն՝ Խաղաղության խորհուրդը նախընտրում է ուղղակի նվիրատվություններ կատարել JPMorgan հաշվի միջոցով, որի ներդրումները չեն ենթարկվում անկախ ստուգման, նշել են FT-ի աղբյուրները:
Խաղաղության խորհրդի ներկայացուցիչը լրատվամիջոցին հայտնել է, որ մշակվել են «ֆինանսավորման մի քանի տարբերակներ», այդ թվում՝ Համաշխարհային բանկի մեխանիզմը, սակայն «դոնորները նախընտրում են այլ տարբերակներ փնտրել»։ Նա նաև նշել է, որ կազմակերպությունը գործադիր խորհրդին ֆինանսական հաշվետվություններ կներկայացնի համապատասխան ժամանակում։
Խաղաղության խորհրդի առաջին նիստը տեղի է ունեցել Վաշինգտոնում փետրվարին։ Ինը երկրներ (ԱՄԷ, Ղազախստան, Ադրբեջան, Պակիստան, Բահրեյն, Կատար, Սաուդյան Արաբիա, Ուզբեկստան և Քուվեյթ) խոստացել են, ընդհանուր առմամբ, 7 միլիարդ դոլար տրամադրել Գազայի հատվածում մարդասիրական օգնության և վերականգնման համար։ ԱՄՆ-ը պարտավորվել է տրամադրել 10 միլիարդ դոլար։
Թարգմանությունը՝ Էմմա Չոբանյանի
