ԱՄՆ-ը վիզա չի տրամադրել ՌԴ ԱԳ փոխնախարարին, որը պետք է մասնակցեր ՄԱԿ-ի ԱԽ նիստին

ԱՄՆ-ը մերժել է վիզա տրամադրել Ռուսաստանի ԱԳ փոխնախարար Ալեքսանդր Ալիմովին, որը պետք է մասնակցեր ՄԱԿ-ի Անվտանգության խորհրդի բաց քննարկումներին։ Այս մասին հայտնել է կազմակերպությունում Ռուսաստանի մշտական ​​ներկայացուցիչ Վասիլի Նեբենզյան, գրում է Meduza-ն։

Նա պարզաբանել է, որ ռուսական պատվիրակությանը հրավիրել է Չինաստանի արտաքին գործերի նախարար Վան Ին, որը մայիսի 1-ից նախագահում է ՄԱԿ-ի Անվտանգության խորհուրդը։ Նեբենզյան հայտարարել է, որ Ռուսաստանը վիզայի մերժումը դիտարկում է «ոչ միայն որպես Վաշինգտոնի կողմից իր պարտավորությունների խախտում», այլև որպես «Չինաստանի նախագահության նկատմամբ ակնհայտ անհարգալից վերաբերմունք»։

Նշվում է, որ Դոնալդ Թրամփի պաշտոնավարման երկրորդ ժամկետից ի վեր Ռուսաստանի և Միացյալ Նահանգների միջև դիվանագիտական ​​հարաբերությունները զգալիորեն ջերմացել են նախորդ չորս տարիների համեմատ։ Թրամփի հատուկ բանագնացները բազմիցս այցելել են Մոսկվա, Միացյալ Նահանգները ժամանակավորապես վերացրել է Ռուսաստանի ուղղակի ներդրումների հիմնադրամի  ղեկավար Կիրիլ Դմիտրիևի նկատմամբ պատժամիջոցները, որին ՌԴ նախագահ Վլադիմիր Պուտինը նշանակել է իր հատուկ ներկայացուցիչ, որպեսզի Պետքարտուղարությունը կարողանա նրան մուտքի վիզա տրամադրել։

Արդյունքում Դմիտրիևը մի քանի անգամ մեկնել է Միացյալ Նահանգներ և հանդիպել Թրամփի հատուկ բանագնաց Սթիվ Ուիթկոֆի հետ։ Սակայն ռուսական պատվիրակությունների պաշտոնական ներկայացուցիչներին պարբերաբար մերժում են վիզաներ տրամադրել։

Վասիլի Նեբենզյայի խոսքով՝ սա Ալիմովի հետ կապված առաջին դեպքը չէ։

Թարգմանությունը՝ Էմմա Չոբանյանի