Փաշինյանի հաղթանակի դեպքում ՌԴ-ի հետ Հայաստանի հարաբերությունների խզում տեղի չի ունենա․ Արկադի Դուբնով․ ՏԵՍԱՆՅՈՒԹ

«Երևում է՝ Ռուսաստանի նման կայսրությունների ժամանակն ավարտվել է»,- Factor TV-ին տված հարցազրույցում հայտարարել է ռուսաստանցի քաղաքագետ, Կենտրոնական Ասիայի հարցերով փորձագետ Արկադի Դուբնովը՝ մեկնաբանելով հետխորհրդային երկրների հետ Մոսկվայի հարաբերությունների վերափոխումը։

Դուբնովի խոսքով՝ խորհրդարանական ընտրություններում ՀՀ վարչապետ Նիկոլ Փաշինյանի հաղթանակի դեպքում Ռուսաստանի հետ հարաբերությունները չեն խզվի։

«Եթե «Քաղաքացիական պայմանագիր» կուսակցությունը հաղթի, Ռուսաստանը ստիպված կլինի հաշվի նստել դրա հետ», – նշել է փորձագետը։

Դուբնովը, սակայն, կարծում է, որ Մոսկվան շատ կցանկանար տեսնել իշխող «Քաղաքացիական պայմանագիր» կուսակցության պարտությունն առաջիկա ընտրություններում։

Միևնույն ժամանակ, ըստ քաղաքագետի՝ ԱՄՆ պետքարտուղար Մարկո Ռուբիոյի այցը Երևան դրական ազդեցություն կունենա Նիկոլ Փաշինյանի վարկանիշի վրա։

Անդրադառնալով Հայաստանի ներքաղաքական իրավիճակին՝ Դուբնովը հայտարարել է, որ «հայաստանյան ընդդիմությունը ոչինչ չունի առաջարկելու Ադրբեջանի հետ խաղաղության հարցում»։ Քաղաքագետի խոսքով՝ Մոսկվայի կողմից օլիգարխ Սամվել Կարապետյանին որպես ընդդիմության առաջնորդ ընտրելը չափազանց անհաջող որոշում էր։

Խոսելով տարածաշրջանային գործընթացների մասին՝ Արկադի Դուբնովը նաև կասկած է հայտնել պանթուրքական միասնության գաղափարի հարցում՝ նշելով, որ «պանթուրքական համերաշխությունը գաղափարախոսական փուչիկ է»։ Դուբնովի խոսքով՝ Կենտրոնական Ասիայում այժմ ի հայտ է գալիս նոր ինքնություն՝ Կենտրոնական Ասիայի պետությունների ինքնությունը, որի մաս է կազմում նաև իրանախոս Տաջիկստանը։

Հարցազրույցն ամբողջությամբ՝ տեսանյութում։

Սամվել Մելիքսեթյան